हडपसर - येथील मार्गम डान्स अकादमीच्या पाच विद्यार्थ्यांनी वेगवेगळ्या प्रकारात जागतीक विश्वविक्रम प्रस्थापित केला आहे. या सर्वांची इंटरनॅशनल बुक ऑफ वर्ल्ड रेकॉर्ड मध्ये नोंद झाली असून प्रत्येकजण आपापल्या क्षेत्रात अव्वल कामगिरी करणारे एकमेव लहान मुल ठरले आहे.

कु .सायरा राहुल तुरिले हिने वयाच्या अवघ्या दोन वर्ष चार महीन्याची असताना ६३ सेकंद फुल स्प्लीट होल्ड केले होते. गुरुराज शिंदे याने वयाच्या अवघ्या सातव्या वर्षी योगसाधने मधील कर्ण पिडा आसन बारा मिनिटे तीन सेंकद धारण केले.

कु. सावि आशिष किलजे हिने वयाच्या अवघ्या सातव्या वर्षी महाराष्ट्रातील सर्वात उंच कळसूबाई शिखर अवघ्या दोन तास पंचावन्न मिनटात सर केले. कु. अद्वैता शिंदे हिने अवघ्या बाराव्या वर्षी बारा मिनिटे तीन सेंकद सोलो रिबन डान्स केला आहे. तर कु. संस्कृती पानपट हिने अवघ्या वयाच्या तेराव्या वर्षी तब्बल १० मिनिटे ५५ सेकंद इतका काळ सोलो लावणी नृत्य करून विश्वविक्रम प्रस्थापित केला आहे. रेकॉर्डचे दिल्लीतील मुख्य कार्यकारी अधिकारी पंकज वीज यांनी समन्वयक म्हणून काम पाहिले.

अकादमीच्या संचालक शिल्पा दानवे-तुरिले यांनी या चिमुकल्यांचा सराव घेत मार्गदर्शन केले. त्या म्हणाल्या, 'प्रत्येक लहान मुलामध्ये एक सुप्त गुण असतो. जो त्याला जगात इतरांपेक्षा आपली वेगळी ओळख निर्माण करण्यसाठी प्रेरक ठरतो. प्रत्येक पालकाने अशा सुप्त गुणाची पारख करून आपल्या पाल्याला आयुष्यात प्रोत्साहीत करावे.'