Maharashtra Health and Technical Common Entrance Test: महाराष्ट्र राज्य सामाईक प्रवेश परीक्षा कक्षामार्फत २०२४-२५ या शैक्षणिक वर्षामध्ये अभियांत्रिकी, औषधनिर्माणशास्त्र, कृषी पदवी अभ्यासक्रमाच्या प्रवेशासाठी घेतलेल्या ‘एमएचटी-सीईटी’ परीक्षेचा निकाल रविवारी (ता. १६) सायंकाळी सहा वाजता घोषित करण्यात येणार आहे.

बहूप्रतीक्षेत असणाऱ्या या परीक्षेचा निकाल अखेर रविवारी जाहीर होणार आहे. याआधी परीक्षा कक्षाने जाहीर केलेल्या संभाव्या तारखेनुसार हा निकाल १९ जून रोजी जाहीर होणार होता.

परंतु, आता परीक्षा कक्षातर्फे येत्या रविवारी हा निकाल जाहीर होत असल्याचे अधिकृतरीत्या सांगण्यात आले आहे. राज्यातील अभियांत्रिकी, औषधनिर्माणशास्त्र आणि कृषी पदवी अभ्यासक्रम राबविणाऱ्या महाविद्यालयांमध्ये प्रवेशासाठी ही परीक्षा घेण्यात येते.

या अंतर्गत विविध अभ्यासक्रमांच्या प्रवेशासाठी घेतलेल्या ‘एमएचटी-सीईटी’ (पीसीएम आणि पीसीबी ग्रुप) परीक्षेसाठी तब्बल सात लाख २५ हजार ६४० विद्यार्थ्यांनी नोंदणी केली आहे.

अधिक माहितीसाठी आणि निकालासाठी संकेतस्थळ :

https://cetcell.mahacet.org/