पुणे - समाज माध्यमे आणि ‘रिल्स’च्या मोहात लोकांचे जीव धोक्यात येण्याचे अन् नुकासन होण्याचे प्रकार अलीकडे पाहायला मिळत आहेत. मात्र याच ‘रिल्स’मुळे एका तरुणाला आपली हरवलेली आई सापडल्याची सुखद घटनाही नुकतीच घडली. सोलापूरच्या एका छायाचित्रकाराने पंढरपूरमध्ये चित्रित केलेले ‘रिल’ व्हायरल झाले आणि त्यातून मुंबईच्या तरुणाला हरवलेली आई सापडली.

त्याचे झाले असे की, शिवाजी धुते हे छायाचित्रकार गेल्या पाच वर्षांपासून सोलापूर ते पंढरपूर असा आषाढी वारीचा सोहळा कॅमेऱ्यात टिपण्यासाठी जातात. यंदाही असेच ते पंढरपुरात असताना एका चिमुकल्याने त्यांचे लक्ष वेधून घेतले. तो चिमुकला पावसापासून संरक्षण करणारे कापड विकत होता. त्याची धडपड धुते यांनी आपल्या कॅमेऱ्यात टिपली. त्याचे रिल समाज माध्यमांवर टाकल्यावर बरेच ‘व्हायरल’ झाले.

हे रिल मुंबईतील एका तरुणाने आपल्या मित्राच्या अकाउंटवर पाहिले आणि तो चमकला. याच व्हिडिओत हा मुलगा ग्राहकांना पैसे परत देण्यासाठी एका महिलेकडे सुट्टे पैसे घ्यायला जाताना दिसतो. ती महिला म्हणजे काही दिवसांपूर्वी हरवलेली आपली आई असल्याचे या तरुणाच्या लक्षात आले. त्याने लगेचच हा व्हिडिओ चित्रित करणाऱ्या धुते यांचा संपर्क शोधून काढला आणि त्यांनी दिलेल्या पत्त्यावर जाऊन आईचा शोध घेतला. दोन दिवसांतच या घडामोडी घडल्याने त्याच ठिकाणी तरुणाला आपली आई सापडली.

समाज माध्यमाच्या या ताकदीने एका तरुणाला आपली ‘माऊली’ परत भेटवली आणि ‘रिल’मुळे ताटातूट झालेले मायलेक परत भेटले. ‘‘मी आयटी क्षेत्रातील नोकरी सोडून पूर्णवेळ छायाचित्रणाकडे वळलो आहे. पांडुरंगाने जणूकाही या प्रसंगाच्या निमित्ताने त्याचेच फळ दिले’, अशी प्रांजळ भावना या पुनर्भेटीला निमित्त ठरलेल्या शिवाजी धुते यांनी व्यक्त केली.