पुणे : किरकोळ कारणावरून झालेल्या वादातून टोळक्‍याने हॉटेल मालकासह त्यांच्या दोन कामगारांवर लोखंडी हत्यारांनी वार केले. या घटनेत हॉटेल मालकासह त्यांचे दोन कामगारही गंभीर जखमी झाले. हि घटना शनिवारी दुपारी चार वाजता धायरी येथे घडला. (Pune Nwes)

मयूर मते (वय 33), इसराफील, अश्‍फाक (पूर्ण नावे मिळाली नाहीत) अशी जखमी झालेल्यांची नावे आहेत. याप्रकरणी मते यांनी दिलेल्या फिर्यादीवरुन टोळक्‍याविरुद्ध गुन्हा दाखल करण्यात आला. पोलिसांनी दिलेल्या माहितीनुसार, धायरीतील गणेशनगरमध्ये मयूर मते यांचे "गारवा बिर्याणी हॉटेल' नावाचे हॉटेल आहे. शनिवारी दुपारी चार वाजण्याच्या सुमारास त्यांची एका ग्राहकासोबत किरकोळ कारणावरुन बाचाबाची झाली होती.

या वादाचा राग धरून संबंधीत तरुणाने त्याच्या इतर साथीदारांना हॉटेलमध्ये बोलाविले. त्यानंतर त्यांनी हॉटेलमध्ये प्रवेश करून त्यांच्याकडील लोखंडी धारदार हत्यारांनी मते यांच्यावर वार करून त्यांना जीवे मारण्याचा प्रयत्न केला. त्यावेळी मते यांचे कामगार इसराफील व अश्‍फाक हे दोघेही भांडणामध्ये पडले. त्यांनी टोळक्‍यापासून मते यांना वाचविण्याचा प्रयत्न केला. तेव्हा टोळक्‍याने त्यांच्या कामगारांवरही वार केले. त्याचबरोबर हॉटेलमधील बिर्यानीचे पातेले, त्यावरील झाकणे, लोखंडी खुर्च्या, ट्रे मते व त्यांच्या कामगारांवर फेकून मारले. त्यानंतर हॉटेलबाहेर जमलेल्या लोकांना आणि शेजारील दुकानदारांना शिवीगाळ करून त्यांच्यातही दहशत निर्माण करण्याचा प्रयत्न केला. या प्रकरणाचा तपास पोलिस उपनिरीक्षक दीपक खेडकर करीत आहेत.