पुणे - तळ कोकणात दाखल झालेल्या मॉन्सूनची वाटचाल अरबी समुद्रातील बिपॉरजॉय चक्रीवादळामुळे थांबली होती. आता चक्रीवादळाचा परिणाम निवळ्यावर रविवारनंतरच (ता.१८) शहरात मॉन्सून दाखल होईल, असा अंदाज हवामान खात्याने वर्तविला आहे. तो पर्यंत दिवसभर ढगाळ हवामान तर तुरळक ठिकाणी हलक्या स्वरूपाच्या पावसाची शक्यता वर्तविण्यात आली आहे.

गुरुवारी दिवसभर शहरात ढगाळ हवामान होते, तर उपनगरांमध्ये काही ठिकाणी वारा सुटल्याचे पाहायला मिळाले. असे असले तरी ऊन-सावलीच्या खेळामध्ये उकाडाही जाणवत होता. मॉन्सूनचे आगमन लांबले असतानाच आता पूर्वमोसमी पावसाने उघडीप दिल्याचे चित्र आहे. रविवारपर्यंत तरी शहरात आकाश अंशतः ढगाळ आणि तुरळक ठिकाणी हलक्या पावसाची शक्यता वर्तविण्यात आला आहे. त्यामुळे पुढील आठवड्यापर्यंत तरी पुणेकरांना मॉन्सूनच्या पहिल्या पावसाची प्रतिक्षा करावी लागेल.

मॉन्सूनची प्रगती...

कोकणातील रत्नागिरीपर्यंत पोचल्यानंतर नैर्ऋत्य मोसमी वाऱ्याची (मॉन्सून) महाराष्ट्रातील वाटचाल थांबली आहे. चक्रीवादळ निवळल्यानंतर मॉन्सूनची प्रगती होण्याची शक्यता हवामान विभागाने वर्तविली आहे. तळ कोकणात, दक्षिण मध्य महाराष्ट्राच्या काही भागात दाखल झालेल्या मॉन्सूनचे सोमवारी (ता. १२) दक्षिण भारताच्या काही भागासह, संपूर्ण पूर्वोत्तर राज्ये आणि सिक्कीमसह, पश्चिम बंगाल, बिहारच्या काही भागांत प्रगती केली.

त्यानंतर मॉन्सूनची वाटचाल थांबली आहे. रविवारपर्यंत (ता. १८) ही वादळी प्रणाली राजस्थानमध्ये निवळून जाण्याची शक्यता आहे. त्यानंतर मॉन्सून पुढे चाल करण्याचे संकेत आहेत. १८ ते २१ जून दरम्यान दक्षिण द्वीपकल्प आणि पूर्व भारताच्या आणखी काही भागात मॉन्सूनची प्रगती होण्याचा अंदाज आहे.

महत्त्वाचे....

- शहरात ढगाळ हवामान कायम

- रविवारनंतर मॉन्सून पुढे चाल करण्याचे संकेत

- चक्रीवादळामुळे गुजरात आणि महाराष्ट्राच्या किनारपट्टीवर उंच लाटा

- शहरातील कमाल सरासरी तापमान ३२ अंशाच्या दरम्यान असणार