कोंढवा : येवलेवाडी परिसरातील सर्वे क्रमांक ३० मधील हिल टॉप हिल स्लोप क्षेत्रामधील तीन अनाधिकृत बांधकामांवर पालिकेच्या बांधकाम विकास विभाग झोन २ च्या वतीने कारवाई करण्यात आली. परिसरातील ३ हजार चौरस फूटावर बांधण्यात आलेले २४ गोडाऊनच्या माध्यामांतून ३८००० चौरस फूट अनधिकृत बांधकाम पाडण्यात आले.

तसेच, येवलेवाडी मुख्य रस्त्यावरील अनधिकृत २ हजार चौरस फूट पत्रा शेडवर कारवाई करण्यात आली. या कारवाईसाठी २ जेसीबी, गॅस कटर व अतिक्रण विभागाकडील ९ बिगारी मजूरांचा वापर करण्यात आला. अनधिकृत बांधकामे थांबवावीत याबाबतची नोटीस देऊन बांधकामे सुरूच ठेवल्याने सदरील कारवाई अधिक्षक अभियंता युवराज देशमुख यांच्या मार्गदर्शनाखाली कार्यकारी अभियंता हेमंत मोरे उपअभियंता राजेश खाडे,

उपअभियंता विजय कुमावत, इमारत निरीक्षक उमेश गोडगे, विक्रम क्षिरसागर, सुरेखा बनसोडे यांच्या पथकाने केली. कारवाई दरम्यान कोणताही अनुचित प्रकार घडू नये, यासाठी अतिक्रमण विभागाचे पोलिस उपनिरीक्षक निवृत्ती झांजरे यांच्यासह अतिक्रमण विभागाकडील पोलिस कर्मचाऱ्यांच्या पथकाने बंदोबस्त ठेवला होता.

लोकांनी कोणत्याही जागेची किंवा व्यावसायिक दुकानाची खरेदी करताना महापालिकेच्या सर्व परवानग्या तपासून घ्याव्यात. तसेच अनाधिकृत ठिकाणी खरेदी करु नये. कोणीही अशाप्रकारे अनधिकृत बांधकाम करु नये. यापुढेही अशाप्रकारे अाधिकृत बांधकामांवर नियमीत कारवाया करण्यात येणार आहेत.

- राजेश खाडे, उपअभियंता, बांधकाम विकास विभाग झोन-२