निगडी - स्मार्ट आणि स्वच्छ शहरासाठी महत्त्वपूर्ण ठरणाऱ्या पहिल्या ई टॉयलेटचे उद्‌घाटन सोमवारी (ता. २५) निगडीत झाले. शहरात अजून चार ठिकाणी अशी ई टॉयलेट उभारण्यात येणार आहेत.

महापालिका आणि सॅमटेक कंपनी यांच्या संयुक्त प्रयत्नांतून हा उपक्रम राबविण्यात येत आहे. ई टॉयलेटची गरज, किफायतशीरपणा यावर उपस्थित मान्यवरांनी मते मांडली. स्वच्छता अभियानात ई टॉयलेटची गरज असून, या अभियानाला यामुळे अधिक चालना मिळेल. अशा टॉयलेटच्या उभारणीसाठी अधिक पुढाकार घ्यावा; तसेच स्वच्छ शहरासाठी पालिकेने अशा टॉयलेटची संख्या वाढवावी. प्रसंगी अधिक आर्थिक भार पेलावा, अशीही सूचना वक्‍त्यांनी या वेळी केली.

आमदार लक्ष्मण जगताप, महापौर नितीन काळजे, उपमहापौर शैलजा मोरे, स्थायी समिती अध्यक्षा सीमा सावळे, सत्तारूढ पक्षनेते एकनाथ पवार, स्वच्छ भारत अभियानाच्या राजदूत नेमबाज अंजली भागवत यांनी मनोगत व्यक्त केले. या वेळी आयुक्त श्रावण हर्डीकर, नगरसेविका सुमनताई पवळे, कमल घोलप, आशा धायगुडे, शर्मिला बाबर, सुनीता तापकीर, विधी समिती सभापती शारदा सोनवणे, अ प्रभाग अध्यक्ष केशव घोळवे, ब प्रभाग अध्यक्ष सचिन चिंचवडे, क प्रभाग अध्यक्ष अश्‍विनी जाधव, चंदा लोखंडे, कैलास बारणे, सहायक आयुक्त दिलीप गावडे उपस्थित होते. आभार नगरसेवक उत्तम केंदळे यांनी मानले.

ई टॉयलेटच्या उद्‌घाटनास पदाधिकारी, नगरसेवक आणि महापालिकेच्या अधिकारी, कर्मचाऱ्यांचाच फौजफाटा अधिक होता. नागरिकांची संख्या बोटांवर मोजण्याइतपत होती. मोठा डामडौल पण सामान्य नागरिक कार्यक्रमापासून दूर, हे या वेळी अधोरेखित झाले.