पुणे : राष्ट्रवादी काँग्रेसचे पारनेरचे आमदार निलेश लंके यांनी आज शरद पवार यांची पुण्यातील कार्यालयात जाऊन भेट घेतली. या ठिकाणी शरद पवारांसह त्यांची पत्रकार परिषदही पार पडली. यानंतर त्यांनी कोविड काळात केलेल्या कामावर आधारित एका पुस्तकाचं प्रकाशन पवारांच्या हस्ते पार पडलं.

यावेळी अजित पवारांसोबत असलेले लंके शरद पवार गटात प्रवेश करतील अशी चर्चा सुरु होती. पण लंकेंचा पक्ष प्रवेश झाला नाही. पण त्यांनी काही सूचकपणे संकेत दिले आहेत. (nilesh lanke says sharad pawar will say that is order for me he clearly indicates in press coference)

शरद पवारांच्या हस्ते पुस्तक प्रकाशन करणार असल्याचं जेव्हा लंके यांनी जाहीर केलं त्यावेळी अजित पवारांनी प्रतिक्रिया देताना लंकेंना लोकसभेचं आश्वासन दिलं असेल अशी टिप्पणी केली होती. त्या टिप्पणीवर भाष्य करताना लंके म्हणाले, "खासदारकीची आणि कुठल्याही निवडणुकीची शरद पवारांसोबत माझी चर्चा झालेली नाही. अजूनही मी पवारांच्या विचारधारेसोबत आहे. बहुजन समाजासह सर्वसामान्यांना घेऊन जाणारा जो नेता आहे त्या नेत्याची विचारधारेसोबत आहोत. (Latest Marathi News)

काल आज आणि उद्याही शरद पवारांची विचारधारेसोबत मी असणार आहे. नेते समोर बसलेले असताना कार्यकर्त्यानं सुसंस्कृतपणा पाळायचा असतो. त्यामुळं मी इथं काहीही बोलू शकत नाही. साहेब सांगतील तो आदेश आहे. साहेबांच्या मंचावरुन दुसऱ्या मंचावर जाणं सोप आहे का? अशा सूचकपणे लंके यांनी आपण शरद पवारांसोबतच आहोत हे सांगितलं आहे. (Latest Maharashtra News)

संभाजी महानाट्य जेव्हा मतदारसंघात आयोजित केलं होतं तेव्हा अमोल कोल्हेंशी लोकसभा निवडणुकीबाबत बोलणी झाली होती का? या पत्रकारांच्या प्रश्नावर लंके म्हणाले, "अनेक दिवसांपासून आमचं चाललं होतं की, अमोल कोल्हेंचं महानाट्य आयोजित करायचं. पण त्यांच्या तारखा जुळून येत नव्हत्या, अमोल कोल्हे आणि माझे भावासारखे संबंध आहेत. त्यामुळं त्यांच्याशी चर्चेनंतर ते माझ्या मतदारसंघात महानाट्यासाठी तयार झाले.