पुणे : श्री संत ज्ञानेश्वर महाराज आणि श्री संत तुकाराम महाराज यांच्या पालखीचे मंगळवारी पंढरपूरच्या दिशेने मार्गस्थ झाल्यानंतर लाखो वारकरीदेखील शहराच्या बाहेर पडले. त्यानंतर महापालिकेच्या घनकचरा विभागाच्या कर्मचाऱ्यांनी अवघ्या काही तासात शाळा, मंदिरे, धर्मशाळा, रस्ते, उद्यानामध्ये स्वच्छता मोहीम सुरु केली. यामध्ये सुमारे २५६ टन कचऱ्याचे संकलन करण्यात आले.

शहरात दोन दिवस दोन्ही पालखीचा मुक्काम होता. या दोन्ही पालखी सोहळ्याचे शहरात आगमन झाल्यापासून ते शहरातून बाहेर जाईपर्यंत स्वच्छतेवर भर देण्यात आला होता. नाना पेठ, भवानी पेठेत पालखीचा मुक्काम असल्याने तेथे पादुकांच्या दर्शनासाठी लाखो नागरिक आले होते. तेथे २४ तास ७०० कर्मचारी स्वच्छतेच्या कामासाठी नियुक्त करण्यात आले होते.

वारकऱ्यांचा मुक्काम पेठांमध्ये असल्याने भवानी पेठ क्षेत्रीय कार्यालय, कसबा विश्रामबाग क्षेत्रीय कार्यालयासह, बिबवेवाडी क्षेत्रीय कार्यालय, हडपसर मुंढवा, रामटेकडी वानवडी या क्षेत्रीय कार्यालयांमध्ये रस्त्यावर पडलेल्या प्लास्टिकच्या बाटल्या, चहाचे कप, पाण्याचे ग्लास, खाद्यपदार्थ, केळीचे साल यांसह अन्य प्रकारचा कचरा झाडणकाम करून संकलित करण्यात आला.

महिला वारकऱ्यांसाठी पालिकेच्या शाळांमध्ये निवासाची व्यवस्था होती. तेथे मोफत सॅनिटरी नॅपकिन, हिरकणी कक्ष स्थापन केले होते. तेथील स्वच्छता करण्यात आली. दिंड्या पुढे गेल्यानंतर पेठांमधील रस्ते, लष्कर भागातील रस्ते, सोलापूर हडपसर रस्ता यांसह अन्य भागात स्वच्छता केली. यामध्ये २५६ टन कचरा संकलित केला. त्यांची शास्त्रोक्त पद्धतीने विल्हेवाट लावली आहे.

- संदीप कदम, उपायुक्त, घनकचरा विभाग