सोमेश्वरनगर : पुणे जिल्हा परिषदेचा शिक्षण विभाग (माध्यमिक), जिल्हा मुख्याध्यापक संघ व गणित अध्यापक संघ यांच्या संयुक्त विद्यमाने गणित दिनानिमित्त शुक्रवारी (ता. 22 डिसें.) दहावीच्या विद्यार्थ्यांसाठी पुणे टॅलेंट सर्च (PTS) परीक्षेचे आयोजन करण्यात आले आहे.

पुणे शहर, पिंपरी चिंचवड व ग्रामीण भागातील मराठी आणि इंग्रजी माध्यमाचे जवळपास चाळीस हजार विद्यार्थी ही परीक्षा देणार आहेत, अशी माहिती मुख्याध्यापक संघाचे जिल्हाध्यक्ष नंदकुमार सागर यांनी दिली.

भारतीय गणितज्ञ श्रीनिवास रामानुजन यांच्या जन्मदिनी 22 डिसेंबरला 'राष्ट्रीय गणित दिन' साजरा केला जातो. यानिमित्त मागील वर्षांपासून जिल्ह्यात पुणे जिल्हा माध्यमिक व उच्च माध्यमिक मुख्याध्यापक संघ व जिल्हा गणित अध्यापक संघ हे शिक्षण विभागाच्या पुढाकाराने गणित विषयाची वस्तुनिष्ठ स्वरूपाची वीस गुणांची परीक्षा घेत आहेत.

मागील वर्षी 35 हजार मुलानी ही परीक्षा दिली होती. यावर्षी 450 शाळेतील 32000 विद्यार्थ्यांनी नोंदणी केली आहे. याची नोंदणी वाढत असून उद्या सुमारे चाळीस हजार विद्यार्थी सकाळी अकरा ते बारा या वेळेत जिल्हाभर परीक्षा देतील हा एक विक्रमच असेल, अशी माहिती अध्यक्ष नंदकुमार सागर, सचिव प्रसाद गायकवाड यांनी दिली.

दहावीच्या सर्व विद्यार्थ्यांसाठी बोर्ड परीक्षेच्या दृष्टीने वस्तुनिष्ठ प्रश्नांची पूर्वतयारी व्हावी, तसेच स्पर्धा परीक्षांची ओळख व्हावी या हेतूने गणित विषयाची ही परीक्षा घेण्यात येते असे मत, गणित अध्यापक संघाचे जिल्हाध्यक्ष देविदास शिंदे व सचिव सचिन घनवट यांनी दिली.

परीक्षेचे संपूर्ण नियोजन भारत काळे, कल्याण कडेकर, संदिप लोणकर, भगवान पांडेकर, नाना डुकरे, शंकर धावणे, नाना घळके, संजय गवळी, संजय पवळे, मारुती मांढरे, पांडुरंग आटोळे, स्मिता रावल, जितेंद्र त्रिवेदी, योगेश माळशिरसकर, दत्तात्रय रणनवरे, भाऊसाहेब सातपुते, अतुल क्षिरसागर, प्रविण ताजणे तसेच सर्व गणित अध्यापक करत आहेत.