पाबळ - मलठण (ता. शिरूर) येथील शिंदेवाडी येथे रविवारी (ता. २८) खंडोबा देवाच्या यात्रेनिमित्त आयोजित केलेल्या बैलगाडा शर्यतीत ज्ञानोबा शिंदे, भानुदास शिंदे व संजय शिंदे यांच्यात वडिलोपार्जित जमीन वाटपाच्या कारणावरून तुंबळ हाणामारी झाली. त्यात संजय शिंदे यांचा मृत्यू झाला.

पोलिसांनी दिलेल्या माहितीनुसार, मलठण येथील शिंदेवाडी येथे रविवारी खंडोबा देवाच्या यात्रेनिमित्त बैलगाडा शर्यतीचे आयोजन केले होते. बैलगाडा घाटात संजय शिंदे बैलगाडा शर्यत पाहात असताना त्यावेळी भानुदास ज्ञानोबा शिंदे यांनी तेथे येऊन, ‘तु लई माजलाय, आम्हाला जमीन वाटून मागतो काय, तुला आता जिवंत सोडत नाही, तुला आता खल्लासच करतो.’ असे म्हणून लाकडी दंाडक्याने गंभीर मारहाण केली.

तसेच, ज्ञानोबा गोविंद शिंदे यांनीही, ‘आता याला जीवच मारून टाकतो’ असे म्हणून लाथाबुक्क्यांनी मारहाण करून गंभीर जखमी केले. स्थानिक नागरिकांनी संजय शिंदे (रा. रावडेवाडी, ता. शिरूर) यांना उपचारासाठी शिरूर येथील खासगी रुग्णालयात दाखल केले असता उपचारादरम्यान त्यांचा मृत्यू झाला.

याबाबत गंगूबाई रखमा शिंदे (वय ६२, रा. रावडेवाडी, ता. शिरूर) यांनी शिरूर पोलिस ठाण्यात फिर्याद दिली. पोलिसांनी भानुदास ज्ञानोबा शिंदे, ज्ञानोबा गोविंद शिंदे (रा. शिंदेवाडी- मलठण) यांच्यावर गुन्हा दाखल केला. याबाबतचा पुढील तपास पोलिस निरीक्षक जोतीराम गुंजवटे यांच्या मार्गदर्शनाखाली सहाय्यक पोलिस निरीक्षक अमोल पन्हाळकर करत आहे.