कात्रज : नॅशनल झू ऑथॉरिटी आणि महाराष्ट्र राज्य वन खात्याने पुण्यातील राजीव गांधी प्राणिसंग्रहालयात (Rajiv Gandhi Zoological Park & Wildlife Research, Katraj) तरस आणि गव्याची जोडी आणण्यासाठी मान्यता दिली होती. त्यानंतर १६५० किमीचा प्रवास करत केरळमधील तिरुवनंतपुरमधील त्रिवेंद्रम प्राणी संग्रहालयातून या दोन जोड्या पुण्यात दाखल झाल्या आहेत.पहिल्यांदाच तरसाची जोडी राजीव गांधी प्राणिसंग्रहालयात दाखल झाली आहे. तत्पूर्वी, खंदकाचे काम सुरु असल्याने तरसाच्या जोडीला विलगीकरण कक्षात ठेवण्यात आले आहे. काम पूर्ण झाल्यानंतर त्यांना त्या खंदकात सोडण्यात येणार आहे. त्यानंतर तरस पर्यटकांना पाहता येईल.

गव्याची जोडी मात्र पर्यटकांना पाहण्यास उपलब्ध आहे. प्राणिसंग्रहालयात पूर्वीपासूनच एक गवा पर्यटकांना पाहण्यासाठी उपलब्ध होता. या जोडीसह आता एकूण गव्यांची संख्या तीन झाली आहे. गव्याच्या जोडीचे नाव किट्टू आणि अविका असून तरसाचेही लवकरच नामकरण करण्यात येणार आहे. त्रिवेंद्रम प्राणिसंग्रहालय ते पुणे हा कात्रज प्राणिसंग्रहालयाचा आतापर्यंतचा सर्वात मोठा प्राणी वाहतूक दौरा होता. ही सर्व अदलाबदलीची आणि वाहतूकीची प्रक्रिया प्राणिसंग्रहालयाच्या पथकानेच केली आहे. शहरातील पर्यटकांसह आजूबाजूंच्या नागरिकांसाठी ही एक पर्वणी ठरणार आहे. कात्रजच्या प्राणीसंग्रहालयात एक-एक करत अनेक प्राणी आणण्यात येत आहेत. यावर्षी, रानमांजर, वाघाटी आणि शेकरू आणल्यानंतर आता प्राणीसंग्रहालयात तरस हा नवीन प्राणी दाखल झाल्याची माहिती संग्रहालय प्रशासनाने दिली आहे.

प्राणिसंग्रहालय अद्यावत करत पर्यटकांना जास्तीत जास्त सुविधा देण्याचा आमचा प्रयत्न आहे. येणाऱ्या काळातही पर्यटकांसाठी सहज पाहण्यासाठी न उपलब्ध होणारे विविध प्राणी आणण्याचा महापालिकेचा मानस आहे.

- विलास कानडे, अतिरिक्त आयुक्त