पुणे : रस्ता ओलांडताना भरधाव दुचाकीने धडक दिल्याने एका पादचारी तरुणाचा मृत्यू झाला. ही घटना येरवड्यातील गुंजन चौक ते शास्त्रीनगर रस्त्यावर घडली. अपघातानंतर दुचाकीस्वार पसार झाला आहे.

दिनेश रामफेर कनोजिया (वय २९, रा. जयप्रकाशनगर, येरवडा) असे मृत्युमुखी पडलेल्या तरुणाचे नाव आहे. याबाबत कनोजियाचा मित्र नूरमहम्मद अन्सारी (वय ३९, रा. येरवडा) यांनी फिर्याद दिली आहे. त्यावरून येरवडा पोलिस ठाण्यात अज्ञात दुचाकीस्वाराविरुध्द गुन्हा दाखल करण्यात आला आहे.

कनोजिया शनिवारी (ता. २८) रात्री साडेआठ वाजता शास्त्री रस्त्याने निघाले होते. गुंजन चौकाजवळ ब्ल्यू ग्रास कंपनीसमोर ते रस्ता ओलांडत होते. त्यावेळी भरधाव दुचाकीने कनोजिया यांना धडक दिली. या अपघातात कनोजिया गंभीर जखमी झाले. त्यांना तातडीने रुग्णालयात दाखल करण्यात आले. परंतु त्यांचा उपचारादरम्यान मृत्यू झाला. पोलिसांनी सीसीटीव्ही चित्रीकरण ताब्यात घेतले असून, दुचाकीस्वाराचा शोध घेण्यात येत आहे.