पुणे : पुणेकरांना सक्षम सार्वजनिक वाहतूक व्यवस्था पुरविण्याच्या उद्देशाने नव्याने ५०० इलेक्ट्रीक बस खरेदी करून त्या पुणे महानगर परिवहन महामंडळाकडे (पीएमपी) देण्यात येणार आहेत. त्याचवेळी विविध भागांतील वाहतूक सुरळीत आणि सुरक्षित करण्यासाठी नव्याने चार उड्डाणपूल, मुळा-मुठा नद्यांवर दोन ठिकाणी पुलांची उभारणीही केली जाणार आहे. वाहतुकीबाबतच्या जागृतीसाठी येरवड्यात ट्रॉफिक पार्क नियोजित केला आहे.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा 

शहरातील वाहतूक व्यवस्था सुधारून तिची व्याप्ती वाढविण्यावरही महापालिकेच्या अंदाजपत्रकात भर देण्यात आला आहे. त्यानुसार नव्याने ५०० बस खरेदी, त्यासाठीच्या पायाभूत सुविधा उभारण्यात येणार आहे. या योजनेसाठी ५० कोटी रुपयांची तरतूद केली आहे.

पुढील वर्षभरात नव्याने ३० किलोमीटर रस्त्यांची बांधणी करण्यात येणार असून, विविध भागांत ५६ रस्ते तयार केले जाणार आहेत. ही कामे खासगीकरणातून (पीपीपी मॉडेल) करण्याचे नियोजन आहे. विकास आराखड्यातील (डीपी) रस्ते विकसित करण्याच्या दृष्टीने कार्यवाही होणार आहे.

Video: पुणेकरांनो, चला राष्ट्रीय युद्ध स्मारकाकडे; नूतनीकरणानंतर सर्वसामान्यांसाठी खुलं

विश्रांतवाडी, कल्याणीनगर ते कोरेगाव पार्क, खराडी, सिंहगड रस्त्यावर उड्‌डाणपूल उभारण्याची कामे हाती घेतली जाणार आहेत. त्याशिवाय वाहनतळे, भुयारी मार्गही केले जातील. बोपोडी-सांगवी मुळा नदीवर पुलाचे काम सुरू करण्यात येणार असून, त्यासाठी १० कोटी रुपयांची तरतूद आहे. सायकल योजनेलाही प्रोत्साहन देत, दरवर्षी किमान १० किलोमीटर लांबीच्या सायकल मार्गांची बांधणी करण्यात येणार आहे.