पुणे : कोरोना व्हायरसमुळे मृत्यू पावलेल्या व्यक्तींवर अंत्यसंस्कार (दहन किंवा दफन) करण्याला विरोध करणाऱ्यांना धडा शिकविण्याची भूमिका महापालिका प्रशासनाने बुधवारी (ता.६) घेतली आहे.
कोरोनाबद्दल गैरसमज करून आपल्या भागांतील स्मशानभूमीत अंत्यसंस्कार करण्याला विरोध करणारे लोकप्रतिनिधी आणि नागरिकांविरोधात फौजदारी गुन्हा दाखल करण्याचा निर्णय महापालिकेने घेतला आहे. त्यामुळे मृतांवरील अत्यंसंस्काराच्या मार्गातील अडथळे दूर झाली आहेत.
पुणे शहरात कोरोनामुळे मृत्यूमुखी पडणाऱ्यांची संख्या वाढली असून, आतापर्यंत 111 जणांचा जीव घेतला आहे. मात्र, हे मृतदेह ताब्यात घेण्यापासून त्यावरील अत्यंसस्कारावरून गैरसमज निर्माण झाले आहे. त्यामुळे अगदी मृतांच्या नातेवाइकांपासून महापालिकेच्या आरोग्य खात्यातील कर्मचारीही पुढे येत नसल्याचे स्पष्ट झाले आहे.
काही दिवसांपूर्वी येरवड्यातील एका कुटुंबातील नातेवाइकांनी मृतदेह घेणार नसल्याच्या मुद्यांवरून महापालिकेच्या अधिकाऱ्यांशी वादही घातला होता. एवढेच नव्हे, अशा मृतदेहांवर आपल्या भागांतील स्मशानभूमीत अत्यंसंस्कार (दहन किंवा दफन) करू नये, असा आग्रह स्थानिक नागरिक घेत आहेत; तर काही लोकप्रतिनिधीही उघडपणे विरोध करीत असल्याचे स्पष्ट झाले आहे. त्यामुळे महापालिका प्रशासनापुढे अडचणी उभ्या ठाकल्या होत्या.
या पार्श्‍वभूमीवर अत्यंसंस्कारात हस्तक्षेप करणाऱ्यांविरोधात फौजदारी कारवाई करण्याचा प्रस्ताव महापालिकेच्या सहायक आरोग्य प्रमुख डॉ. कल्पना बळीवंत यांनी आयुक्तांपुढे ठेवला होता. तो मंजूर करण्यात आला आहे.
डॉ. बळीवंत म्हणाल्या, ''कोरोना रुग्णांच्या मृतदेहांवर दोन ते अडीच तासांत अत्यंसंस्कार झालेच पाहिजेत. परंतु, सध्या या रोगाबाबत गैरसमज असल्याने अत्यंसंस्काराला विरोध होत आहे. त्यामुळे लोकांचा हस्तक्षेप कमी करण्यासाठी कठोर पावले उचलली जाणार आहेत.''
- पुण्याच्या बातम्या वाचण्यासाठी येथे ► क्लिक करा
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.