पुणे : दुकान बंद करून घरी निघालेल्या चहा विक्रेत्याचे पाच हजार रुपये चोरल्याप्रकरणी गुन्हा दाखल करण्यास भारती विद्यापीठ पोलिस टाळाटाळ करीत असल्याचा प्रकार घडला आहे. गुन्हा दाखल करून घेण्यासाठी चहा विक्रेते चार ते पाच वेळा पोलिस ठाण्यात गेल्यानंतर त्यांना विविध कारणे सांगत नंतर या असा कळविले जात आहे.

याबाबत सविस्तर माहिती अशी की, बाळू सोपान कटके (वय ६३, रा. गुजरवाडी, रासकर पार्क) यांचे मॉडेल कॉलनीमधील दीप बंगला चौकाजवळ चहाचा स्टॉल आहे. पाच एप्रिलला रात्री नऊ वाजता ते दुकान बंद करून घरी जात होते.

ते दुचाकीवरून गुजरवाडी फाटा पोचले असता दुचाकीवरून आलेल्या तिघांना त्यांच्याशी किरकोळ कारणावरून वाद घातला. त्यानंतर पुढे काही अंतरावर तिघांची त्यांची दुचाकी आडवी करून कटके यांना थांबवले.

‘कशीही गाडी चालवता’ असे म्हणून एका आरोपीने त्यांचा पाय धरला. त्यानंतर धकामावत कपटे यांच्या खिशातून पाच हजार रुपये काढून घेतले व तिघे फरार झाले. हा प्रकार घडल्यानंतर मी दुसऱ्या दिवशी गुन्हा दाखल करण्यासाठी कात्रज चौकीत गेलो.

मात्र वरिष्ठ अधिकारी नसल्याने गुन्हा दाखल करता येणार नाही, असे सांगत मला दुसऱ्या दिवशी बोलविण्यात आले. त्यानुसार मी पुन्हा सात एप्रिलला चौकीत गेले. मात्र तक्रार दाखल करून घेण्यात आले नाही.

त्यानंतर मला भारती विद्यापीठ पोलिस ठाण्यात जाण्यास सांगितले. तेथे गेल्यानंतर देखील माझी कोणी दखल घेतली नाही, असे कटके यांनी सांगितले. गुन्हा घडून आठ दिवस उलटले तरी अद्याप तक्रार दाखल न झाल्याची खंत त्यांनी व्यक्त केली. गुन्हा दाखल का करण्यात आला नाही याची चौकशी करून याबाबत त्वरित गुन्हा दाखल करून घेतला जात आहे. दशरथ पाटील, पोलिस निरीक्षक, भारती विद्यापीठ पोलिस ठाणे