Pune News : मद्यपी वाहनचालकांवर कारवाई सुरू असताना मद्यपी दुचाकीस्वाराने महिला पोलिस अधिकाऱ्यासह कर्मचाऱ्यावर बाटलीतील पेट्रोल ओतून पेटविण्याचा प्रयत्न केला. पोलिसांनी प्रसंगावधान राखून मद्यपीला पकडल्याने अनर्थ टळला. खुनाचा प्रयत्न केल्याने त्याला अटक केली आहे.
या घटनेत सहाय्यक पोलिस निरीक्षक शैलजा जानकर आणि हवालदार समीर सावंत यांना किरकोळ दुखापत झाली आहे. खुनाचा प्रयत्न करणे, तसेच शासकीय कामात अडथळा आणल्याप्रकरणी संजय फकिरबा साळवे (वय ३२, सध्या रा. पिंपरी-चिंचवड, मूळ रा. पिंपळगाव शेला, जवखेडा बुद्रूक, जि. जालना) याच्यावर गुन्हा दाखल केला आहे. याबाबत हवालदार सावंत यांनी विश्रामबाग पोलिस ठाण्यात फिर्याद दिली. कल्याणीनगर अपघात प्रकरणानंतर मद्यपी वाहनचालकांवर कारवाई सुरू करण्यात आली आहे.
शहराच्या वेगवेगळ्या भागांत नाकाबंदी करून वाहनचालकांची तपासणी करण्यात येत आहे. त्यानुसार शुक्रवारी (ता. ५) सायंकाळी साडेसहाच्या सुमारास नाकाबंदी करून वाहनचालकांची तपासणी करण्यात येत होती. दुचाकीस्वार साळवे याची तपासणी करण्यात आली. त्याने मद्यप्राशन केल्याचे आढळून आले.
त्यामुळे त्याच्यावर कारवाई सुरू करण्यात आली. त्याला फरासखाना वाहतूक शाखेच्या कार्यालयात नेले. तेथे त्याने पोलिसांच्या हातातील ई-चलन यंत्र हिसकावून घेतले. या घटनेनंतर वाहतूक शाखेच्या सहाय्यक पोलिस निरीक्षक जानकर तेथे आल्या. साळवेने बाटलीतील पेट्रोल जानकर आणि सावंत यांच्या अंगावर ओतले. त्याच्याकडील लायटरने पेटवून देण्याचा प्रयत्न केला. मात्र पोलिसांनी प्रसंगावधान दाखविल्याने मोठा अनर्थ टळला. साळवेवर गुन्हा दाखल करून त्याला रात्री अटक करण्यात आली.
साळवे याला शनिवारी न्यायालयात हजर केले होते. गुन्ह्याच्या पुढील चौकशीसाठी आरोपीला पोलिस कोठडी देण्याची मागणी सरकारी वकिलांनी केली. त्यानुसार साळवेला एक दिवसाची पोलिस कोठडी सुनावली आहे.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.