पिंपरी - बाजारभावापेक्षा जवळपास अर्ध्या दरात पिंपरी-चिंचवड नवनगर विकास प्राधिकरणाची चार हजार ८८३ घरे येत्या दोन वर्षांत उपलब्ध होणार आहेत. सुमारे ४५७ कोटी रुपयांच्या या प्रकल्पाच्या कामाचे आदेश नुकतेच देण्यात आले असून, प्रत्यक्षात काम सुरू झाले आहे. गेल्या वीस वर्षांतील प्राधिकरणाची ही पहिलीच मोठी योजना आहे.

प्राधिकरणाच्या मोशी पेठ क्रमांक १२ मध्ये सुमारे ८० हेक्‍टर जागा आहे. त्यापैकी ९.३४ हेक्‍टर जागेवर नवीन घरांचा प्रकल्प होतो आहे. पर्यावरण विभाग आणि राज्य सरकारची त्याला रीतसर संमती मिळाली आहे. आर्थिक दुर्बल घटक (ईडब्ल्यूएस) आणि अल्प उत्पन्न घटक (एलआयजी) यांच्यासाठी हे प्रकल्प असल्याने त्यासाठी अडीच चटई क्षेत्र निर्देशांक (एफएसआय) मंजूर आहे. अत्यंत सुसज्ज आणि सर्व सुविधायुक्त असा हा गृहप्रकल्प असेल. त्याची निविदा फेब्रुवारी २०१८ मध्ये काढण्यात आली. त्याच्या पंधरा दिवसांपूर्वी प्रत्यक्ष कामाचे आदेश देण्यात आले. पहिल्या टप्प्यातील काम यशनंद इंजिनिअर ॲण्ड कॉन्ट्रॅक्‍टर आणि दुसऱ्या टप्प्यातील काम शांती कन्स्ट्रक्‍शन जेव्ही यशनंद इंजिनिअर ॲण्ड कॉन्ट्रॅक्‍टर यांना देण्यात आले. कामाची मुदत चोवीस महिने आहे.

प्रकल्पातील सर्व इमारती या ११ मजली असतील. तळमजल्यावर पार्किंग आणि दुकाने असतील. त्याशिवाय मुख्य रस्ता, अंतर्गत रस्ते, पदपथ, क्‍लब हाउस, उद्यान आदी सुविधा असतील. संपूर्ण सोसायटीत ‘रेन वॉटर हार्वेस्टिंग’ आणि सांडपाणी प्रक्रिया प्रकल्प असेल. 

एकूण सहा हजार घरांचे काम
पेठ क्रमांक १२ मधील पाच हजार घरांशिवाय पेठ क्रमांक ६ मध्ये ३८४ सदनिकांचा नियोजित प्रकल्प आहे. वाल्हेकरवाडी येथे सुमारे ९०० घरांचे बांधकाम संथ गतीने सुरू आहे. पेठ क्रमांक १२ मधील उर्वरित ७० हेक्‍टर जागेवरही परवडणाऱ्या घरांचा आराखडा तयार करण्याचे काम सुरू आहे. 

सर्वसामान्य नागरिकांना परवडणारी घरे उपलब्ध करून देण्यासाठी प्राधिकरणाचा हा प्रकल्प आहे. काम अत्यंत दर्जेदार असेल. दोन वर्षांत ही घरे विक्रीसाठी उपलब्ध होतील.
- प्रमोद यादव, प्राधिकरण मुख्य कार्यकारी अधिकारी