पुणे : जिल्हा परिषदेतील क वर्गीय रिक्त पदांची भरती करण्यासाठी महाभरतीअंतर्गत याआधी मार्च २०१९ आणि आॅगस्ट २०२१ मध्ये राबविण्यात आलेली नोकर भरती प्रक्रिया राज्याच्या ग्रामविकास विभागाने शुक्रवारी (ता.२१) रद्द केली आहे. यामुळे या दोन्ही भरती प्रक्रियेत नोकरीसाठी अर्ज केलेल्या सर्व उमेदवारांना त्यांचे परीक्षा शुल्क परत केले जाणार आहे. हे परीक्षा शुल्क जिल्हा परिषदेकडून परत देण्यात येणार असल्याचे राज्याच्या ग्रामविकास विभागाने जाहीर केले आहे. दरम्यान, या रिक्त पदांच्या भरतीसाठी येत्या जानेवारी महिन्यात नव्याने जाहिरात प्रसिद्ध केली जाणार आहे. त्यामुळे मागील तीन वर्षांपासून स्थगित असलेली जिल्हा परिषद नोकर भरती करण्याचा मार्ग आता मोकळा झाला आहे.

राज्याच्या ग्रामविकास विभागाने याबाबतचा आदेश जिल्हा परिषदांना दिला आहे. या आदेशाची प्रत शुक्रवारी पुणे जिल्हा परिषदेला मिळाली आहे. जिल्हा परिषदेतील क वर्ग संवर्गातील रिक्त पदांचा सुधारित आकृतिबंध तयार केला जाणार आहे. हा सुधारित आकृतिबंध मंजूर झाल्यानंतर नव्याने या रिक्त पदांच्या भरतीसाठी नव्याने जाहिरात प्रसिद्ध केली जाणार आहे. सुधारित आकृतिबंध मंजूर करण्यासाठी दोन महिन्यांचा कालावधी निश्‍चित करून देण्यात आला आहे. दरम्यान, ही भरती प्रक्रिया आता पूर्वीप्रमाणे जिल्हा परिषद पातळीवरच राबविली जाणार आहे.

पूर्वी जिल्हा परिषदेतील विविध संवर्गातील रिक्त पदे ही दरवर्षी भरली जात असत. यासाठी जिल्हा परिषद स्तरावरच भरती प्रक्रिया राबविली जात असे. जिल्हा परिषदेत क संवर्गातील विविध प्रकारची १८ पदे आहेत. यापैकी आरोग्य विभागातील विविध पाच संवर्गातील रिक्त पदे भरण्यास परवानगी देण्यात आलेली आहे. उर्वरित सर्व संवर्गातील क वर्गीय रिक्त पदे ही सुधारित आकृतिबंध मंजूर झाल्यानंतरच भरावीत, असे ग्रामविकास विभागाने जिल्हा परिषदेला दिलेल्या आदेशात नमूद केले आहे.