पुणे - कामानिमित्त कोलकत्याहून पुण्यात आलेल्या प्राध्यापकाचा येथील एका तारांकित हॉटेलमधील जलतरण तलावात बुडून मृत्यू झाल्याप्रकरणी जलतरण तलावातील जीवरक्षक, तसेच हॉटेलच्या व्यवस्थापनावर गुन्हा दाखल करण्यात आला आहे. दोन एप्रिलला सकाळी सात वाजण्याच्या सुमारास प्राध्यापकाचा बुडून मृत्यू झाला होता.

मोहित प्रमोद आगरवाल (वय ३५, रा. बी. के. पॉल ॲव्हेन्यू, कोलकता, पश्चिम बंगाल) असे मृत्युमुखी पडलेल्या प्राध्यापकाचे नाव आहे. याबाबत आगरवाल यांचे नातेवार्इक अमर संतोष मनका (वय ३४, रा. खराडी, नगर रस्ता) यांनी शिवाजीनगर पोलिस ठाण्यात फिर्याद दिली आहे. त्यानुसार गणेशखिंड रस्त्यावरील प्राइड हॉटेलचे व्यवस्थापन, जलतरण तलावातील जीवरक्षकावर गुन्हा दाखल करण्यात आला आहे.

पोलिसांनी दिलेल्या माहितीनुसार, मोहित आगरवाल सनदी लेखापाल अभ्यासक्रम करणाऱ्या विद्यार्थ्यांना मार्गदर्शन करतात. कोलकत्याहून ते पुण्यात विद्यार्थ्यांना मार्गदर्शन करण्यासाठी आले होते. एका संस्थेत त्यांचे मार्गदर्शनपर व्याख्यान आयोजित करण्यात आले होते. त्यासाठी ते गणेशखिंड रस्त्यावरील प्राइड हॉटेलमध्ये थांबले होते. घटनेच्या दिवशी सकाळी ते पोहण्यासाठी जलतरण तलावात उतरले. त्यानंतर त्यांचा बुडून मृत्यू झाला.

ही दुर्घटना घडली तेव्हा जीवरक्षक जलतरण तलाव परिसरात उपस्थित नव्हते. आगरवाल जलतरण तलावात बुडाल्याचे उघडकीस आल्यानंतर त्यांना जीवरक्षकांनी पाण्यातून बाहेर काढले. हॉटेल व्यवस्थापन, तसेच जीवरक्षकाच्या निष्काळजीपणामुळे ही दुर्घटना घडली, असे फिर्यादीत नमूद आहे. पोलिस उपनिरीक्षक बाजीराव नाईक या गुन्ह्याचा तपास करत आहेत.