राजेश कणसे

आळेफाटा - अनेक दिवसांपासुन राजुरी परिसरात धुमाकुळ घालणारा बिबट्या शुक्रवारी पहाटेच्या सुमारास पिंज-यात जेरबंद झाला आहे.

याबाबत मिळालेल्या माहितीनुसार राजुरी (ता.जुन्नर)या परिसरात बिबट्याने अनेक दिवसांपासुन पाळीव प्राण्यांवर हल्ले करुन ठार केले होते.त्यामुळे या ठिकाणी वनविभागाने पिंजरा लावण्यात यावा यासंर्दभाची बातमी दै.सकाळ ने प्रसिध्द केली होती.

या बातमीची दखल वनविभागाने घेतल्यानंतर या गावातील यमाई तुकाई मळ्यामधील गोविंद शंकर हाडवळे यांच्या शेतावर पिंजरा लावण्यात आला होता. व शुक्रवारी पहाटे पाच वाजण्याच्या सुमारास हा चार वर्षे वयाचा बिबट्या जेरबंद झाला आहे.घटना स्थळी वन अधिकारी त्रिंबक जगताप,स्वप्निल हाडवळे यांणी त्यास माणिक डोह येथील बिबट्या निवारण केंद्रात सोडले आहे.

दरम्यान राजुरी हे गाव बिबटया प्रवण क्षेत्रात मोडत असुन ऊसाचे क्षेत्र मोठ्या प्रमाणावर असुन येथील नागरीकांचा दररोज कुठे ना कुठे दररोज बिबट्याचे दर्शन होत आहे.

वनविभागाने या बिबटयांणा पकडण्यासाठी पिंज-यांची संख्या वाढवावी अशी मागणी माजी सभापती दिपक औटी,गावचे सरपंच प्रिया हाडवळे ,उपसरपंच माऊली शेळके,विघ्नहर साखर कारखान्याचे संचालक कुंडलिक हाडवळे ,एम.डी.घंगाळे यांणी केली आहे.