पुणे : प्रस्तावित बालभारती ते पौंड फाटा रस्ता, वेताळ टेकडीच्या खालून बोगदा पाडून जाणारे दोन रस्ते तसेच नदीकाठ सुधार योजना या संदर्भात 'वेताळ टेकडी बचाव कृती समिती'च्या सदस्यांनी माजी उपमुख्यमंत्री अजित पवार यांची बुधवार ( ता.२६) पुण्यात पवार यांच्या निवासस्थानी भेट घेतली.

भेटीदरम्यान पवार यांना प्रस्तावित प्रकल्प झाल्यास पर्यावरणावर होणारे परिणाम, वृक्षतोड, भूजल पातळीचे नुकसान यावरती थोडक्यात माहिती दिली. पवार यांनी प्रकल्पांशी संबंधित समस्यांसाठी वेळ देऊन लवकरच सखोल सादरीकरण पाहण्याचे आश्वासन दिले. 'वेताळ टेकडी बचाव कृती समिती'चे सदस्य व पवार यांच्या बैठकीचे आयोजन खासदार वंदना चव्हाण यांनी केले होते. 'वेताळ टेकडी बचाव कृती समिती'चे सदस्य डॉ. सुषमा दाते, हर्षद अभ्यंकर, अमेय जगताप, प्राजक्ता दिवेकर, योगेश आळंदकर, सारंग यादवाडकर आदी उपस्थित होते.