पुणे : पुणे महापालिकेच्या साने गुरुजी नगर (आंबिल ओढा) येथील वसाहतीचा पुनर्विकास करण्यासाठी स्थायी समितीने मान्यता दिली. याकामासाठी १३ कोटी ४२ लाख रुपये इतका खर्च अपेक्षीत असल्याचे स्थायी समितीचे अध्यक्ष हेमंत रासने यांनी सांगितले.

या प्रकल्पासाठी राबविण्यात आलेल्या निविदा प्रक्रियेत निखिल कन्स्ट्रक्शन या कंपनीने ११.११ टक्के कमी दराने सर्वात कमी खर्चाची निविदा भरली. त्यास मान्यता देण्यात आली. प्रकल्पासाठी सुमारे १३ कोटी ४२ लाख रुपयांचा खर्च अपेक्षित असून, जीएसटीचे एक कोटी ८१ लाख रुपये आणि रॉयल्टी म्हणून २ लाख ९५ हजार रुपये, मटेरिअल टेस्टिंग साठी २८ लाख ७३ हजार रुपयांचा खर्च अपेक्षित आहे.

या वसाहतीमध्ये महापालिका कर्मचाऱ्यांची घरे असून, साने गुरुजी नगर पुनर्विकासाचा निर्णय अनेक वर्षांपासून प्रलंबित आहे. सध्याची घरे ५० पेक्षा जास्त वर्षाहून जुनी असल्याने काही इमारती धोकादायक झाल्या आहेत. त्यामुळे या वसाहतींच्या पुनर्विकासाचा निर्णय घेण्यात आला आहे. हे काम पूर्ण करण्यास अडीच वर्ष लागणार आहे, असे रासने यांनी सांगितले.

वैद्यकीय महाविद्यालयासाठी फर्निचर आणि पुस्तक खरेदी

पुणे महापालिकेच्या भारतरत्न अटलबिहारी वाजपेयी वैद्यकीय महाविद्यालयासाठी बाबूराव सणस विद्यालयात १ कोटी ९७ लाख रुपयांचे फर्निचर आणि ६२ लाख ५१ हजार रुपयांच्या पुस्तकांची खरेदीस स्थायी समितीने मान्यता दिली.