Pune Crime Update: चोरीच्या गुन्ह्यात अटकेत असलेल्या संशयित आरोपीला विश्रामबाग पोलिस ठाण्याच्या कोठडीत चक्कर आली. त्यानंतर ससून रुग्णालयात दाखल केलेल्या आरोपीचा शनिवारी (ता. १०) उपचारादरम्यान मृत्यू झाला. या प्रकरणाचा तपास राज्य गुन्हे अन्वेषण विभागाकडे (सीआयडी) सोपविण्यात आला आहे.

सचिन अशोक गायकवाड (वय ४७, रा. मुंढवा) असे मृत्युमुखी पडलेल्याचे नाव आहे. पोलिसांनी दिलेल्या माहितीनुसार, पर्वती पोलिसांनी चोरीच्या गुन्ह्यात सचिन गायकवाड आणि मनोहर रमेश माने (वय ३६, रा. मुंढवा) या दोघा संशयितांना अटक केली होती. वैद्यकीय तपासणी करून अटकेची कारवाई केली होती. त्यानंतर दोघांना विश्रामबाग-फरासखाना पोलिस ठाण्यातील कोठडीत ठेवण्यात आले होते. न्यायालयाने दोघांना १० ऑगस्टपर्यंत कोठडीत ठेवण्याचे आदेश दिले होते. शुक्रवारी (ता. ९) सायंकाळी सहा वाजण्याच्या सुमारास गायकवाडला कोठडीत चक्कर आली. पोलिसांनी तातडीने या घटनेची माहिती वरिष्ठ अधिकाऱ्यांना दिली. त्याला तातडीने ससून रुग्णालयातील अतिदक्षता विभागात दाखल करण्यात आले. परंतु उपचारादरम्यान त्याचा मृत्यू झाला. मेंदूतील रक्तस्रावामुळे गायकवाडचा मृत्यू झाल्याचे प्राथमिक तपासणीत निष्पन्न झाले, अशी माहिती परिमंडळ तीनचे पोलिस उपायुक्त संभाजी कदम यांनी दिली.