पुणे - चोरट्यांनी पोलिस असल्याचे भासवून हॅंडबॅगमध्ये गांजा असल्याचे सांगून तपासणी करण्याच्या बहाण्याने बॅगेतील चार हजार अमेरिकन डॉलर (सुमारे तीन लाख २० हजार रुपये) लंपास केले.

याप्रकरणी कोंढव्यातील मिठानगर येथील एका ५८ वर्षीय नागरिकाने फिर्याद दिली आहे. त्यानुसार कोंढवा पोलिसांनी तिघांविरुद्ध गुन्हा दाखल केला आहे. ही घटना कोंढव्यातील पारगेनगरमधील वेलकम हॉल चौकात ९ एप्रिल रोजी रात्री १० वाजण्याच्या सुमारास घडली.

पोलिसांनी दिलेल्या माहितीनुसार, फिर्यादी आणि त्यांची पत्नी अरेबिया रेस्टॉरंट येथे रात्री जेवण करुन घरी परतत होते. ते वेलकम हॉल चौकात आले.

त्यावेळी मोटारीतून आलेल्या तिघांपैकी एकाने ओळखपत्र दाखवून पोलिस असल्याचे सांगितले. त्यांच्याजवळ हॅंडबॅगेत गांजा असल्याचे सांगत तपासणीसाठी फिर्यादीकडील हॅंडबॅग घेतली. तपासणी करण्याच्या बहाण्याने हॅंडबॅगमधील चार हजार अमेरिकन डॉलर घेवून चोरटे पसार झाले.