पुणे - प्रेमास नकार दिल्यामुळे एका तरुणाने ‘माझे तुझ्यावर प्रेम असून, माझ्याबरोबर न आल्यास तुझ्या अंगावर अ‍ॅसिड टाकीन’ अशी तरुणीला धमकी दिली. ही घटना बोपोडी परिसरात घडली. या प्रकरणी बोपोडीमधील एका २२ वर्षीय तरुणीने फिर्याद दिली आहे. त्यावरून यश रोहित पटेकर (वय २२, रा. बोपोडी) याच्याविरुध्द खडकी पोलिसांनी गुन्हा दाखल केला आहे.

पोलिसांनी दिलेल्या माहितीनुसार, फिर्यादी तरुणी आणि यश हे दोघे एकाच महाविद्यालयात शिक्षण घेत होते. त्यांच्यात प्रेमसंबंध निर्माण झाले. परंतु तो तरुणीला सतत फोन करुन त्रास देत होता. त्यामुळे तिने त्याचा मोबाईल ब्लॉक केला. तेव्हा त्याने ‘फोटो व्हायरल करून कुटुंबाची बदनामी करीन. तसेच, माझ्यासोबत न आल्यास अंगावर अ‍ॅसिड टाकीन,’ अशी धमकी दिली. तरुणीने त्याला नकार दिल्यावर ‘माझ्याही जीवाचे बरेवाईट करीन’, असे सांगून तो निघून गेला. त्यानंतर तरुणीने पोलिस ठाण्यात फिर्याद दिली.