फुलवडे : आंबेगाव येथील बाळू मेमाणे आपल्या कुटुंबासमवेत लग्नासाठी नायफड ता. खेड येथे गेले होते. लग्नकार्य आटोपल्यानंतर पायवाटेने घरी परतत असताना वाटेत दबा धरून बसलेल्या बिबट्याने त्यांची मुलगी आराध्या बाळू मेमाणे (वय ६ वर्षे) हिच्यावर हल्ला केला.

मोठ्याने आरडाओरडा केल्यामुळे बिबट्या तिथून पळून गेला. जखमी झालेल्या मुलीला तातडीने तळेघर येथील आरोग्य केंद्रात आणले परंतु गंभीर जखम असल्याने तिला घोडेगाव येथील ग्रामीण रुग्णालयात आणण्यात आले.

याप्रसंगी तळेघरच्या वनपाल सुवर्णा जगताप व तेरुंगणचे वनरक्षक बी. डी. पटेकर यांचे सहकार्य लाभले. घोडेगाव वनपरिक्षेत्र अधिकारी महेश गारगोटे यांनी रुग्णालयात जाऊन मुलीची विचारपूस केली.

खेड व आंबेगाव तालुक्याच्या पश्चिम आदिवासी भागात बिबट्यांच्या वावर वाढला असून यापूर्वी खेड तालुक्यातील पश्चिम भागात दोन घटना घडलेल्या आहेत. दोन दिवसांपूर्वी टोकावडे ता. खेड भागात भर दिवसा रानात बिबट्याचे दर्शन झाल्याचे स्थानिक नागरिकांनी सांगितले. त्यामुळे या आदिवासी भागातील नागरिकांमध्ये घबराटीचे वातावरण पसरले आहे.

वनविभागाने याबाबत ठोस उपाययोजना करणे गरजेचे आहे. अन्यथा बिबट्याच्या हल्ल्यात अनेक नागरिकांचे बळी जातील. याबाबत वनविभागाकडे विचारणा केली असता बिबट प्रवण क्षेत्रात गस्त वाढविण्यात आली असल्याचे अधिकाऱ्यांनी सांगितले.