मार्केट यार्ड - कृषी उत्पन्न बाजार समिती पुणेमधील बेकायदेशिर लिंबू विक्री करणाऱ्यांवर कारवाई केल्याचा राग मनात धरून माजी प्रशासक, अधिकारी, कर्मचारी व अडत्यांच्या विरोधात दाखल झालेला ॲट्रॉसिटी आणि विनयभंगाचा गुन्हा रद्द व्हावा, या मागणीकडे लक्ष वेधण्यासाठी बाजारातील विविध संघटनांनी सोमवारी (ता.१७) काळे कपडे घालुन निषेध व्यक्त करत मुक मोर्चा काढला. यावेळी सर्व संघटनांच्या वतीने मार्केट यार्ड पोलीस स्टेशनला निवदेन देण्यात आले.

गुन्हे रद्द करण्याच्या मागणीकडे लक्ष वेधण्यासाठी सोमवारी (ता.१७) काळे कपडे घालुन मार्केट यार्ड येथील जय शारदा गजानन मंदिर ते मार्केट यार्ड पोलीस स्टेशन पर्यंत मुक मोर्चा काढून निषेध व्यक्त केला. यावेळी अडते असोसिएशनचे अध्यक्ष अनिरूद्ध (बापू) भोसले, ज्येष्ठ अडते गणेश घुले, माजी अध्यक्ष विलास भुजबळ, सचिव करण जाधव, युवराज काची, राहुल कोंढरे, तोलणार संघटनेचे अध्यक्ष राजेंद्र चोरघे, कामगार संघटनेचे विशाल केकाने, संतोष नांगरे, नितीन जामगे, राजेंद्र सूर्यवंशी यांच्यासह विविध संघटनांचे पदाधिकारी, तसेच बाजार समितीचे कर्मचारी मोठ्या संख्येने उपस्थित होते.

बाजारातून लिंबू विक्रेते पूर्णपणे बंद केल्यानंतर तब्बल सहा महिन्यांनंतर याप्रकरणी अधिकारी, अडते यांच्यावर ॲट्रॉसिटी आणि विनयभंगाचे गुन्हे दाखल झाले. ही अन्यायकारक गोष्ट आहे. भविष्यात खोट्या गुन्ह्यांच्या भीतीने कोणतीही कारवाई होणार नाही. त्यामुळे खोटे गुन्हे तातडीने मागे घेण्याची मागणी निवेदनाद्वारे मार्केट यार्डात विविध संघटनाच्या वतीने करण्यात आले.

गुरुवारी मार्केट बंद

बाजार समितीचे अधिकारी, कर्मचारी, अडते यांच्यावर दाखल झालेले खोटे ॲट्रॉसिटी आणि विनयभंगाचे गुन्हे मागे घ्यावेत या मागणीसाठी सोमवारी मुक मोर्चा काढण्यात आला. त्यांनतर गुरूवारी (ता.२०) एक दिवस बाजार बंद ठेवण्यात येणार आहे.

दाखल झालेले गुन्हे रद्द करण्याची मागणी मुख्यमंत्री, गृहमंत्र्यांकडे केली आहे. तसेच बाजारातील अडते, टेम्पो, कामगार, तोलणार संघटनेसह विविध संघटनानीदेखील गुन्हे मागे घेण्याबाबत मुख्यमंत्री, गृहमंत्री, पुणे पोलीस आयुक्तांना निवेदन दिले आहे.

- गणेश घुले, जेष्ठ अडते, मार्केट यार्ड.