कात्रज - कोंढवा-येवलेवाडी क्षेत्रिय कार्यालयाच्या हद्दीतील सुखसागरनगर-राजीवगांधीनगर रस्त्यावर ड्रेनेजच्या समस्येने नागरिक त्रस्त झाले आहेत. ड्रेनेजचे पाणी रस्त्यावर साचत असून त्यामुळे परिसरात दुर्गंधी सुटली असून सातत्याने उद्भवणाऱ्या ड्रेनेजच्या समस्येने नागरिक त्रस्त आहेत. चेंबर तुंबल्याने मैलायुक्त पाणी रस्त्याने वाहत असून मागील महिनाभरापासून पाठपुवारावा करुनही कोंढवा-येवलेवाडी क्षेत्रिय कार्यालयाकडून ठोस उपाययोजना करण्यात आलेली नसून सातत्याने ड्रेनेजचे पाणी रस्त्यावर येत असल्याने नागरिकांमधून संताप व्यक्त होत आहे.

या ड्रेनेजच्या पाण्यामुळे सकाळच्यावेळी नागरिकांना रस्त्याने चालता येत नाही. दुर्गंधीसह डास माशांचा प्रादुर्भाव वाढला असून साथीच्या रोगांना निमंत्रण मिळते. या भागात चेंबर तुंबण्याच्या घटना गेल्या अनेक महिन्यांपासून वारंवार होत आहेत. क्षेत्रीय कार्यालय ड्रेनेज विभागाकडून तात्पुरती दुरुस्ती केली जाते, त्यामुळे नागरिकांमध्ये नाराजीचा सूर असून क्षेत्रिय कार्यालयाच्या कार्यक्षमतेबाबत प्रश्नचिन्ह उपस्थित केले जाते. अशा घटनांमुळे नागरिकांचे आरोग्य धोक्यात आले आहे.

एकवेळेस याठिकाणी काम केले असून ते निकृष्ट दर्जाचे आहे. निकृष्ट दर्जाचे काम करायचे असेल कर कशासाठी करायचे हा प्रश्न आहे. मागील महिनांभरापासून ड्रेनेजचे पाणी साचत असल्याची तक्रार मी अधिकाऱ्यांकडे करत आहे. मात्र, त्याला चुकीच्या पद्धतीने प्रतिसाद देण्यात येत आहे.

नरेंद्र शिंदेकर, स्थानिक नागरिक

संबंधित काम आम्ही हाती घेतलेले आहे. परंतु, पाणी वाहून नेणाऱ्या पाईपची रुंदी असमान झाल्याने हा प्रश्न उद्भवला होता. पुढील दोन ते तीन दिवसांत याठिकाणी होत असलेली अडचण दुर करून नागरिकांना त्रास होणार नाही याची काळजी घेण्यात येईल.

नरेश शिंगटे, कनिष्ठ अभियंता, ड्रेनेज विभाग