पुणे, ता. ५ : कल्याणीनगर अपघात प्रकरणातील अल्पवयीन मुलाला वाचविण्यासाठी त्याच्या रक्ताचा नमुना बदलून पुरावा नष्ट करण्याचा प्रयत्न केल्या प्रकरणात अग्रवाल पती-पत्नी यांच्या पोलीस कोठडीत 10 जूनपर्यंत वाढ करण्यात आली आहे. तर ससूनमधील डॉक्टर आणि कर्मचारी यांच्या पोलिस कोठीडत सात जूनपर्यंत वाढ करण्यात आली आहे. सत्र न्यायाधीश व्ही. आर. कचरे यांनी हा आदेश दिला.

मुलाचे वडील व बांधकाम व्यावसायिक विशाल सुरेंद्रकुमार अग्रवाल आणि आई शिवानी विशाल अग्रवाल (दोघेही रा. बंगलो क्र. १, ब्रम्हा सनसिटी, वडगाव शेरी), ससूनच्या न्यायवैद्यक विभागाचे प्रमुख डॉ. अजय तावरे आणि आपत्कालीन विभागाचा मुख्य वैद्यकीय अधिकारी डॉ. श्रीहरी हाळनोर, शिपाई अतुल घटकांबळे यांच्या पोलिस कोठडीत वाढ करण्यात आली आहे. 

पोलिस कोठीडची मुदत संपत असल्याने त्यांना बुधवारी (ता.५) न्यायालयात हजर करण्यात आले होते. सर्व आरोपींना मिळून कशाप्रकारे या गुन्ह्याच्या कट रचला याचा तपास करायचा असल्याने आरोपींच्या पोलीस कोठीडत वाढ करण्यात यावी, असा युक्तिवाद सरकारी वकिलांकडून करण्यात आला.