Latest Pune News: हुतात्मा बाबू गेणू जलाशय डिंभे धरण(ता. आंबेगाव)च्या पाणलोट क्षेत्रात पावसाने सध्या विश्रांती जरी घेतली असली तरी २२ जुलै रोजी सकाळी धरणात २७.५३ टक्के पाणीसाठयानंतर अवघ्या १३ दिवसात धरण पाण्याने तुडुंब भरले आहे,धरण भरल्यानंतर चार दिवसांत २.८७ टीएमसी अतिरिक्त पाण्याचा विसर्ग घोडनदी पात्रात करण्यात आल्याची माहिती डिंभे धरणाचे उपअभियंता दत्तात्रय कोकणे यांनी दिली.

यंदा डिंभे धरणाचा पाणीसाठा नीचांकी अर्धा टक्के होता,जुलै मध्ये काहीसा पाऊस पडला त्यातून काहीसा टक्का वाढला पण पावसाला काही जोर सापडत नव्हता परंतु जुलै महिना संपण्याच्या तोंडावर २२ जुलै रोजी पावसाला जोरदार सुरुवात झाली.

त्यावेळेस धरणात २७.५३% पाणीसाठा होता पण २२ जुलै ते २५ जुलै चार दिवस झालेल्या जोरदार पावसाने पाणीसाठा दुप्पट होऊन २५ जुलै रोजी सकाळी ५६.४५ % वर पोहचला त्यानंतर धरणातील पाण्याचा टक्का वाढत गेला

२५ जुलै नंतर पुढील १० दिवसात धरण भरले आणि रविवार ४ ऑगस्ट रोजी सकाळी पावसाचा जोर वाढल्याने धरणातून पाणी सोडण्याची वेळ आली,४ ऑगस्ट रोजी सकाळी ८ वाजून ३० मिनिटांनी धरणाचे पाचही दरवाजामधून २५०० क्युसेक पाण्याचा विसर्ग सुरू करण्यात आला त्यानंतर पावसाचा जोर अजून वाढल्याने विसर्ग वाढून ७५००,९०००,१२०००,१५०००,१८००० पर्यंत विसर्ग घोडनदी पात्रात करण्यात आला,त्याच रात्री पावसाचा जोर कमी झाल्याने पाण्याचा विसर्ग ३००० क्यूसेकने कमी करण्यात आला.

५ ऑगस्ट रोजी अजून कमी करण्यात आला आणि आता सध्या घोडनदी पात्रात २५०० आणि उजव्या कालव्यात १५० असा एकूण २६५० क्युसेकने विसर्ग सुरू असून धरणात आज (ता.०८) रोजी सकाळी सहा वाजेपर्यंत ९२.४९% पाणीसाठा धरणात शिल्लक आहे.४ ऑगस्ट ते ७ ऑगस्ट या चार दिवसांत धरणातून घोडनदी पात्रात तब्बल २.८७ टीएमसी पाण्याचा विसर्ग झाला असल्याची माहिती शाखा अभियंता दत्तात्रय कोकणे यांनी दिली.

यंदा धरण लवकर भरले

डिंभे धरण यंदा मागील वर्षीच्या तुलनेत लवकर भरले असून मागीलवर्षी धरणात याच दिवशी ८२% पाणीसाठा शिल्लक होता यंदा ९२.४९ % असून धरणातून २६५० क्यूसेकने विसर्ग सुरू आहे,आंबेगाव,जुन्नर,शिरूर तालुक्यासह नगर,सोलापूर जिल्ह्यातील शेतकऱ्यांना वरदान ठरलेले धरण यंदा लवकर भरल्याने शेतकऱ्यांमध्ये आनंदाचे वातावरण आहे