Pune: बोरी बुद्रूक (ता.जुन्नर) हे गाव कुकडी नदीच्या तिरावर वसलेले असल्याने या ठिकाणी ऊसाचे क्षेत्र मोठ्या प्रमाणावर असल्याने या ठिकाणी बिबट्यांना लपण्यासाठी पुरेशी जागा मिळत असल्याने बिबट्यांचा वावर जास्त दिसुन येत आहे.

सध्या या परिसरातील ऊस तोडणी अंतिम टप्प्यांवर आलेली असल्याने बिबट्यांना लपण्यासाठी जागा उपलब्ध नसल्याने तसेच त्यांना त्यांचे खाद्य मिळत नसल्याने पाळीव प्राण्यांवर तसेच माणसांवर देखील हल्ले करू लागला आहे.

दरम्यान या गावातील साईनगर मळ्यात दुचाकीस्वारांच्या मागे लागत असल्याने येथील नागरिक अतिशय भितीने या ठिकाणाहून ते जा करत आहेत .दोन दिवसांपुर्वी येथील ऋषिकेश जाधव हे दुकान बंद करून घरी येत असताना रोडवरच असलेल्या उसाच्या शेतातुन अचानक पणे आलेल्या बिबटयाने त्यांचा पाठलाग केला परंतु जाधव यांनी गाडीचा वेग वाढवला असता ते जोरात गाडीवरून खाली पडल्यानंतर त्यांनी मोठ्याने आरडाओरड केल्याने बिबट्याने या ठिकाणाहून पळ काढला.

तसेच कालच संजय जाधव व कैलास जाधव या दोन मोटार सायकल वाल्यांच्या मागे बिबट्या लागला होता परंतु ते ही थोडक्यात वाचले आहे.या परिसरात बिबट्याची दहशत वाढतच चालली असुन वन विभागाने या ठिकाणी पिंजरा लावावा अशी मागणी येथील ग्रामस्थांच्या वतीने तंटामुक्त समितीचे अध्यक्ष युवराज कोरडे यांनी केली आहे.