पुणे : मतदान कसं करायचं कुणाला माहीत आहे का रे?... अंक लिहायचा का ‘टिकमार’ करायची?....पेन कुणाचा वापरायचा?... तासभर झालाय रांगेत उभीय, अजून नंबर नाही आला... या आणि अशा अनेक प्रश्नांनी रविवारी सावित्रीबाई फुले पुणे विद्यापीठाची अधिसभा निवडणूक पार पडली.

बहुतेक पदवीधर मतदार पदवीधरांसाठीच मतदान करताना ‘निरक्षर’ असल्याचे पाहायला मिळाला. मतदानाच्या प्रक्रियेपासून ते उभे राहिलेले उमेदवार नक्की कोण आहे, या बद्दल अनेक मतदार अनभिज्ञ होते. मागील वर्षीपेक्षा यंदा मतदारांचा ओघ जरी वाढलेला असला, तरी मतदानासंबंधीच्या जागृतीचा स्पष्ट अभाव दिसत होता. सकाळी १० वाजता संथ गतीने सुरू झालेल्या मतदानाने दुपारनंतर वेग घेतल्याचे पाहायला मिळाले. विद्यापीठ प्रशासनाकडून मतदान केंद्रावरील सुविधांचा आणि प्रक्रियांचा बंदोबस्त पक्का करण्यात आला होता. तसेच विविध पॅलनच्या कार्यकर्त्यांच्या बुथममुळे मतदारांना यादीतील नाव शोधण्यापासून ते मतदानाच्या बूथची इत्थंभूत माहिती मिळाली.

मतदान थांबविले...

दुपारी दोनच्या सुमारास गणेशखिंड येथील मॉडर्न महाविद्यालयात काही काळासाठी मतदान थांबविण्यात आले. विद्यार्थी विकास मंचाच्या बूथवर महाविकास आघाडीच्या कार्यकर्त्यांनी आक्षेप घेतल्यानंतर मतदान काही काळ थांबविण्यात आले.

कुठे ताटकळत तर कुठे निवांत...

प्रोग्रेसिव्ह एज्युकेशन सोसायटीच्या शिवाजीनगर येथील मॉडर्न महाविद्यालयात सकाळपासूनच मतदारांची गर्दी होती. सुमारे एक ते दीड तास मतदानासाठी प्रतिक्षा करावी लागल्याचे औंध येथून आलेल्या एका मतदाराने सांगितले. दुपारी चार वाजेच्या दरम्यान विद्यापीठाचे कुलसचिव डॉ. प्रफुल्ल पवार यांनी भेट देत मतदानासाठीच्या कक्षांची संख्या वाढविण्यास सांगितले. त्यानंतर मतदानाला थोडा वेग प्राप्त झाला.

संस्थांचा ‘अतिरेक’ ः

पुणे, नगर आणि नाशिक जिल्ह्यातील मतदानामध्ये शैक्षणिक संस्था आणि त्यांच्याशी निगडित ‘पॅनल’चा अतिरेक पाहायला मिळाले. मतदारांना मतपेटीपर्यंत जाण्यापासून आणि उमेदवार निवडण्यासाठी भाग पाडणारी ‘गैर’रचना अवलंबिण्यात आली होती. काही केंद्रांमध्ये तर निवडणूक घोषणापत्रापासून उमेदवारांच्या यादी पर्यंत सर्वच उपलब्ध करण्यात आल्याचे निरीक्षण प्रत्यक्ष नोंदविण्यात आले.

नगर, नाशिक आणि पुणे जिल्ह्यातील सर्वच मतदान केंद्रांवर मतदान सुरळीत पार पडले असून, मागच्या वर्षीच्या तुलनेत यंदा मतदारांचा टक्का वाढला आहे. गर्दी झालेल्या ठिकाणी मतदान बुथची संख्या वाढविण्यात आली आहे.

- डॉ. प्रफुल्ल पवार, मुख्य निवडणूक अधिकारी, अधिसभा निवडणूक