जुनी सांगवी - २१ जुनी सांगवीत वयाची पंच्याहत्तरी पार केलेल्या ज्येष्ठ दांपत्याचा अमृत महोत्सवी अभिष्टचिंतन सोहळा अनोख्या पध्दतीने साजरा करण्यात आला. व-हाडी मंडळींची लगबग,पै पाहुण्यांचा झगमाट,नविन साडी पोशाखात कपाळी बांधलेल्या मुंडावळ्या..सनईचे सुर...

भटजींनी धरलेला अंतरपाट या प्रत्यक्ष विवाह सोहळ्याचा केलेला लवाजम्यासह ज्येष्ठ नागरिक संघ सांगवी परिसर यांच्या वतीने या प्रतिकात्मक अभिष्टचिंतन विवाह सोहळ्याचे येथील पुण्यश्लोक अहिल्यादेवी होळकर शाळेच्या सभागृहात आयोजन करण्यात आले होते.यात विवाहास पन्नास वर्ष पुर्ण केलेल्या तीन ज्येष्ठ दांपत्याचा तर वयाची पंच्याहत्तरी पुर्ण केलेल्या बारा जोडप्यांचा प्रतिकात्मक अभिष्टचिंतन विवाह सोहळा उत्साहात साजरा करण्यात आला.

कार्यक्रमास प्रमुख पाहुण्या म्हणून माजी महापौर उषा ढोरे,वारकरी महामंडळाचे पिं.चि.अध्यक्ष विजय आण्णा जगताप, माजी नगरसेवक राजेंद्र जगताप, ज्येष्ठ नागरिक संघाच्या अध्यक्ष वृषाली मरळ, सामाजिक कार्यकर्ते महेश भागवत, गजानन महाराज मंदिर न्यास ट्रस्टचे अध्यक्ष शरद ढोरे आदी उपस्थित होते. ज्येष्ठ नागरिक संघाच्या वतीने आनंद मेळावा साजरा करण्यात आला.यात वयाची ८० वर्षं पुर्ण केलेल्या १९ सभासदांचा सत्कार करण्यात आला.

कार्यक्रमाचे प्रास्ताविक अशोक भोसले यांनी केले.ज्येष्ठांचा सहजिवनाचा आनंद द्विगुणित करण्यासाठी अशा उपक्रमांचे आयोजन करणे हा यामागील हेतू असल्याचे त्यांनी बोलताना सांगितले.कार्यक्रमाचे सुत्रसंचलन अरुण शिंदे यांनी केले.आभार कमलाकर जाधव यांनी मानले.