Urali Kanchan: एका भरधाव टेम्पोने रस्त्याच्या कडेला थांबलेल्या ट्रकला पाठीमागून धडक दिल्याची घटना रविवारी (ता. ११) सकाळी सातच्या सुमारास उरळी कांचन हद्दीतील पुणे- सोलापूर महामार्गावर घडली. या अपघातामध्ये टेम्पो मधील अल्पवयीन मुलाचा जागीच मृत्यू झाला असून उरुळी कांचन पोलिसांनी टेम्पो चालकावर गुन्हा दाखल केला आहे.

बापुराव दत्तात्रय मोहोळकर (रा. बोरीपार्धी, धायगुडेवाडी, ता. दौड) असे पोलिसांनी अटक‌ केलेल्या‌ टेम्पो चालकाचे नाव आहे. तर वैभव भाउसाहेब माळी, (वय १५, रा. बोरमलनाथ मंदिराजवळ, केडगाव चैफुला, ता. दौंड) असे अपघातामध्ये मृत्यू झालेल्या मुलाचे नाव आहे.

याप्रकरणी ट्रकचालक विनायक हनुमंत घोलप (वय २४, रा. सिंधी जवळगा, ता. जि. लातूर, सध्या रा. धायगुडेवाडी, बोरीपार्धी ता. दौंड) यांनी फिर्याद दिली आहे.

उरुळी कांचन पोलिसांनी दिलेल्या माहितीनु‌सार, मयत वैभव माळी हा आरोपी बापुराव मोहोळकर चालवत असलेल्या टेम्पोमधून प्रवास करत होता. मोहोळकर चालवत असलेला भरधाव टेम्पो सोलापूर - पुणे रस्त्यावरील उरुळी कांचन येथे आल्यानंतर चालकाचे‌ टेम्पोवरील नियंत्रण सुटले.

त्यामुळे हा टेम्पो येथील कांचन स्वीट होमच्या जवळ उभ्या असलेल्या ट्रकला पाठीमागून जावून धडकला. या अपघातामध्ये प्रवासी वैभव माळी हा गंभीर जखमी झाला. त्याला ट्रकचालक विनायक घोलप व इतर नागरिकांनी रुग्णालयात दाखल केले. मात्र, डॉक्टरांनी तो मयत झाल्याचे सांगितले.

दरम्यान, मयत मुलाला ट्रकचालक घोलप व इतर नागरिक खासगी हॉस्पिटलमध्ये नेत असताना आरोपी बापूराव मोहोळकर मात्र, टेम्पो घेवून पळून गेला.