पुणे : पुणे व पिंपरी चिंचवड शहर आणि जिल्ह्याच्या ग्रामीण भागात मिळून एकाच दिवसांत सव्वादोन लाखांहून अधिक नागरिकांचे कोरोना लसीकरण करण्याचा नवा उच्चांक मंगळवारी (ता.३१) नोंदवला गेला आहे. आज दिवसभरात जिल्ह्यात एकूण २ लाख ३४ हजार २६० नागरिकांना लस देण्यात आली. यामध्ये जिल्ह्याच्या ग्रामीण भागातील सर्वाधिक १ लाख ६८ हजार ५१२ जणांचे लसीकरण झाले आहे.

जिल्ह्यात याआधी २५ जून २०२१ ला एका दिवसांत सर्वाधिक १ लाख ४३ हजार ६३९ लसीकरणाचा विक्रम नोंदला गेला होता. हा विक्रम आजच्या लसीकरणाच्या आकडेवारीने मोडीत निघाला आहे. पुणे जिल्हा परिषदेने जिल्ह्यात आज बजाज ग्रुपच्या सहकार्याने कोरोना मेगा लसीकरण मोहीम राबविली. या मोहिमेत जिल्ह्यातील सुमारे ५५९ लसीकरण केंद्रावर नागरिकांचे लसीकरण करण्यात आले.

या मेगा लसीकरण मोहिमेसाठी बजाज ग्रुपने जिल्हा परिषदेला लसीचे दोन लाखांहून अधिक मोफत डोस उपलब्ध करून दिले होते. आजच्या लसीकरण मोहिमेतील एकूण लसीकरणापैकी पुणे व पिंपरी चिंचवडमध्ये मिळून सुमारे ६५ हजार ७४८ जणांचे लसीकरण झाले आहे. जिल्ह्यात याआधी आतापर्यंत आठ वेळा एका दिवसांत प्रत्येकी एक लाखाहून अधिक नागरिकांचे लसीकरण झाल्याची नोंद झाली आहे.