Pune News : पुणे जिल्ह्याच्या ग्रामीण भागात रात्रीच्या वेळी आकाशात घिरट्या घालणाऱ्या अनाधिकृत ड्रोन वर कडक कारवाई करण्याच्या सूचना जिल्हाधिकारी व पोलीस अधीक्षक यांना दिल्या असुन पोलीस विभागाने ड्रोन पाडण्यासाठी आधुनिक मशिन (अँटी ड्रोन गन) मागवली आहे.

पोलीस लवकरच या मशिनच्या साह्याने घिरट्या घालणारे अज्ञात ड्रोन पाडण्याची कारवाई करणार असल्याने नागरिकांनी कोणतीही भीती बाळगू नये असे आवाहन सहकारमंत्री दिलीप वळसे पाटील यांनी केले आहे.

पारगाव ता. आंबेगाव येथील भीमाशंकर सहकारी साखर कारखाना येथे आज मंगळवारी सहकार मंत्री दिलीप वळसे पाटील पत्रकारांशी बोलत होते. यावेळी भीमाशंकर साखर कारखान्याचे अध्यक्ष बाळासाहेब बेंडे , जिल्हा बँकेच्या माजी उपाध्यक्षा व आंबेगाव – शिरूर विधानसभा मतदारसंघाच्या भाजपच्या प्रभारी जयश्री पलांडे, प्रांताधिकारी गोविंद शिंदे, तहसीलदार संजय नागटिळक , गटविकास अधिकारी प्रमिला वाळुंज, महावितरण चे कार्यकारी अभियंता शांताराम बांगर , सहाय्यक पोलीस निरीक्षक नेताजी गंधारे आदी उपस्थित होते.

मागील एक महिन्यापासून आंबेगाव तालुक्याच्या पुर्वभागात रात्रीच्या वेळी अज्ञात ड्रोन घिरट्या घालत असल्याने त्या अनुशंगाने अनेक अफवा पसरत असल्याने नागरिक भीतीच्या छायेखाली आहे.

या अज्ञात ड्रोनबाबत प्रशासनाने सुरु केलेल्या कारवाई बाबत बोलताना सहकार मंत्री दिलीप वळसे म्हणाले दिवसा अथवा रात्री विनापरवानगी आकाशात ड्रोन आढळून आल्यास त्यावर कडक कारवाई बाबत जिल्हाधिकारी व पोलीस अधीक्षक यांच्याबरोबर चर्चा झाली असून पोलीस विभागाने ड्रोन पाडण्यासाठी आधुनिक मशिन मागवली आहे.

त्यासाठी तातडीने १५ लाख रुपयांची तरतूद केली आहे. लवकरच मशीन उपलब्ध होणार असुन त्या मशिनच्या साह्याने घिरट्या घालणारे अज्ञात ड्रोन पाडण्याची कारवाई केली जाईल त्यामुळे नागरिकांनी कोणतीही भीती बाळगू नये असे सांगितले आहे.