पुणेः विद्यार्थिनीचा मानसिक छळ आणि दुर्व्यवहार केल्याच्या प्रकरणात पुणे विद्यापीठ एनएसयूआय संघटनेचा अध्यक्ष अक्षय कांबळे यांना निलंबित करण्यात आले आहे. सावित्रीबाई फुले पुणे विद्यापीठातील एका विद्यार्थिनीने कांबळे यांच्या विरोधात पोलिसांत गुन्हा दाखल केला आहे.

अखिल भारतीय विद्यार्थी परिषदेने (अभाविप) यासंबंधी समाजमाध्यमाद्वारे माहिती दिली आहे. मोबाईलवर विद्यार्थिनीला मेसेज करत कांबळे याने त्रास दिला. तसेच समोर येऊन बोलण्याचे धाडस दाखवणाऱ्या विद्यार्थिनीचा मानसिक छळ केला, असा आरोप अभाविपने केला आहे.

संबंधित विद्यार्थिनीने या सर्व घटनेची पोलिसांकडे तक्रार दिली असून, पोलिस प्रशासनाने विनयभंग व विद्यार्थिनीला छळ केल्याप्रकरणी कांबळे यांच्याविरोधात गुन्हा दाखल केला आहे. दरम्यान, पीडित विद्यार्थिनीचा व्हिडिओ सध्या समाज माध्यमांवर व्हायरल झाला आहे. तिने अक्षय कांबळे विरोधात व्हिडिओ प्रसिद्ध करून कारवाईची मागणी केली आहे.

तसेच संबंधित विद्यार्थ्यांवर विद्यापीठ प्रशासनाने सुद्धा कारवाई करून सर्व विद्यार्थिनींना सुरक्षेच्या दृष्टीने आश्वस्त करावे, असे निवेदन अभाविपकडून कुलसचिवांना देण्यात आले आहे.