पुणे : येरवडा कारागृहातील पोलिस कर्मचाऱ्याने स्वत:वर बंदूकीतुन गोळी झाडून घेत आत्महत्या करण्याचा प्रयत्न केला. संबंधित कर्मचाऱ्यास या त्यांच्या सहकाऱ्यांनी उपचारांसाठी तत्काळ रुग्णालयात दाखल केले. मात्र उपचार सुरू असतानाच त्यांचा मृत्यु झाला. ही घटना रविवारी पहाटे साडे चार वाजण्याच्या सुमारास येरवडा कारागृहामध्ये घडली.

अमोल मुरलीधर माने (वय 28, मुळ रा. नगर) असे मृत्यु झालेल्या पोलिसाचे नाव आहे. पोलिसांनी दिलेल्या माहितीनुसार, माने हे मागील पाच वर्षांपासून येरवडा कारागृहात पोलिस शिपाई म्हणून कार्यरत आहेत. जानेवारी महिन्यातच त्यांचे लग्न झाले होते. त्यासाठी ते काही दिवस सुट्टीवर होते. लग्नानंतर आठ दिवसांपुर्वीच ते पुन्हा नोकरीवर रुजु झाले होते.

त्यांना कारागृहाच्या परिसरातच गार्ड ड्युटी दिली जाते, त्यानुसार शनिवारी रात्रीही त्यांना कारागृह परिसरातच गार्ड ड्युटी देण्यात आली होती. दरम्यान, रविवारी पहाटे साडे चार वाजण्याच्या सुमारास माने यांनी त्यांच्याकडील शासकीय पिस्तुलातुन स्वतःवर गोळी झाडून घेत आत्महत्येचा प्रयत्न केला. या घटनेनंतर त्यांच्या सहकाऱ्यांनी त्यांना तातडीने ससून रुग्णालयात दाखल केले. तेथील अतिदक्षता विभागात त्यांच्यावर उपचार करण्यात येत होते. दुपारी तीन वाजण्याच्या सुमारास त्यांचा मृत्यु झाल्याचे डॉक्‍टरांनी घोषीत केले.