पुणे - पुणे शहरात रविवारी दिवसभर बॅटिंग केलेल्या पावसाने सोमवारी ब्रेक घेतला. त्यामुळे शिवाजीनगर येथे कमाल तापमानाच्या पाऱ्याने ३० अंश सेल्सिअसपर्यंत उसळी घेतली. मंगळवारी (ता. १६) शहरात मध्यम ते जोरदार सरी पडण्याची शक्यता हवामान खात्याने वर्तविली आहे.
सोमवारी सकाळी साडेआठ वाजेपर्यंतच्या चोवीस तासांत १६.६ मिलिमीटर पावसाची नोंद झाली. सकाळी साडेआठ वाजल्यानंतर मात्र पावसाने दडी मारली. शहरात सकाळपासून आकाश अंशतः ढगाळ होते. नंतर दुपारी लख्ख सूर्यप्रकाश पडला होता. त्यामुळे कमाल तापमानाचा पारा १.९ अंश सेल्सिअसने वाढून ३० अंश सेल्सिअसपर्यंत गेला. गेल्या तीन दिवसांमधील हे सर्वाधिक कमाल तापमान ठरले.
शहरात एक जून ते १५ जुलै दरम्यान ३५६.२ मिलिमीटर पावसाची नोंद झाली. या कालावधीतील सरासरी २४१.३ मिलिमीटर इतकी असते. यंदा आतापर्यंत सरासरीपेक्षा ११४.९ मिलिमीटर जास्त पाऊस झाल्याचेही हवामान खात्यातर्फे सांगण्यात आले.
मंगळवारी ‘ऑरेंज अलर्ट’
राज्यात मॉन्सून सक्रिय झाला आहे. त्यामुळे कोकणासह मध्य महाराष्ट्रातील पुणे, सातारा आणि कोल्हापूर या जिल्ह्यांना ‘ऑरेंज अलर्ट’ जारी करण्यात आला आहे. रायगड येथे मुसळधार पावसाचा ‘रेड अलर्ट’ देण्यात आला आहे. पुण्याच्या परिसरातील घाट माथ्यावर तुरळक ठिकाणी जोरदार पावसाची शक्यता आहे.
मॉन्सूनची आस असलेला कमी दाबाचा पट्टा सर्वसाधारण स्थितीच्या दक्षिणेकडे असून राजस्थानच्या जैसलमेर पासून कोटा, गुना, दामोह, पेंद्रारोड, संबलपूर, पूरी, कमी दाबाचे केंद्र ते पश्चिम बंगालच्या उपसागरापर्यंत सक्रिय आहे. दक्षिण गुजरातपासून ते उत्तर केरळ किनाऱ्याला समांतर कमी दाबाचा पट्टा विस्तारला आहे.
कमी दाबाचे क्षेत्र
सोमवारी (ता. १५) बंगालच्या उपसागरात दक्षिण ओरिसाच्या किनाऱ्यालगत कमी दाबाचे क्षेत्र तयार झाले असून, त्याला लागून समुद्र सपाटीपासून ७.६ किलोमीटर उंचीवर चक्राकार वाऱ्यांची स्थिती आहे. शुक्रवारपर्यंत पुन्हा असे क्षेत्र निर्माण होईल.
हवामान अंदाज
मुसळधार पाऊस (रेड अलर्ट) - रायगड
जोरदार पाऊस (ऑरेंज अलर्ट) - पालघर, ठाणे, मुंबई, रत्नागिरी, सिंधुदुर्ग, पुणे, सातारा, कोल्हापूर
जोरदार पाऊस (येलो अलर्ट) - नंदुरबार, धुळे, जळगाव, नाशिक, बुलडाणा, अकोला, वाशीम
विजांसह पाऊस (येलो अलर्ट) - नगर, छत्रपती संभाजीनगर, जालना, बीड, धाराशिव, लातूर, नांदेड, परभणी, हिंगोली, अमरावती, यवतमाळ, वर्धा, नागपूर, भंडारा, गोंदिया, चंद्रपूर.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.