मंचर - राष्ट्रवादी काँग्रेसचे नेते माजी खासदार शिवाजीराव आढळराव पाटील यांची पुणे गृहनिर्माण व क्षेत्र विकास मंडळ (म्हाडा) अध्यक्षपदी फेरनिवड राज्य सरकारने केली आहे. याबाबतचा आदेश मंगळवारी (ता.२३) गृहनिर्माण विभागाचे सचिव अजित कवडे यांनी पारित केला आहेत.

नियुक्ती बद्दल शिवाजीराव आढळराव पाटील म्हणाले, 'मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार व सहकारमंत्री दिलीप वळसे पाटील यांनी दुसर्यांदा म्हाडा अध्यक्ष पदाची सोपवलेली जबाबदारी मी समर्थपणे पार पाडीन. प्रामुख्याने शिरूर लोकसभा मतदारसंघातील प्रत्येक तालुक्यात गृहनिर्माण संस्थेच्या माध्यमातून जास्तीत जास्त गरजू लोकांना घरे उपलब्ध करून देणे. या कामाला मी अग्रक्रम देणार आहे.'

आढळराव पाटील यांची निवड जाहीर झाल्यानंतर बुधवारी (ता. २४) शिरूर लोकसभा मतदारसंघातील अनेक गावात कार्यकर्त्यांनी जल्लोष साजरा केला. आढळराव पाटील यांना मोबाईलद्वारे सतत शुभेच्छा नागरिकांकडून दिल्या जात होत्या.