येरवडा : तुमचे नातेवाईक आणि मित्रमंडळींसोबत वाढदिवस साजरा करायला धावत्या मेट्रोमध्ये परवानगी मिळाली तर? काय भन्नाट कल्पना आहे ना. पण हे वास्तवात लवकरच येणार आहे. लहान मुलांच्या वाढदिवस असो की विवाहाचा वाढदिवस, प्रत्येकाच्या आयुष्यात येणाऱ्या विशेष दिवस साजरा करण्यासाठी मेट्रो स्वागत करणार आहे. हौसेला मोल नाही असे म्हणतात पण अल्प शुल्कात पुणेकरांना विविध कार्यक्रम धावत्या मेट्रोमध्ये साजरा करता येणार आहेत.

डिसेंबर अखेर मेट्रो रेल्वे पिंपरी-चिंचवड महानगरपालिका ते वल्लभनगर आणि वनाझ ते गरवारे महाविद्यालय दरम्यान धावणार आहे. त्यामुळे मेट्रोमध्ये जास्तीत जास्त प्रवाशांना आकर्षित करून घेण्यासाठी महामेट्रो मेट्रोमध्ये लहान मोठे वैयक्तिक, कौटुंबिक कार्यक्रमांना परवानगी देणार आहे.

असा असणार उपक्रम...

• लहान मुलांचे व ज्येष्ठांचे वाढदिवस

• विवाहाची बोलणी, साखरपुडा

• विवाहाचा वाढदिवस

• खर्च सभागृहाच्या भाड्यापेक्षाही कमी असणार

• कार्यक्रम करणाऱ्या गटाला तिकिटांसह अवघे तीन ते पाच हजार रुपये शुल्क आकारले जाणार

• महामेट्रो अशा प्रकारचे अभिनव उपक्रम नागपूर मेट्रोमध्येही राबविते

तीस स्थानकांत कार्यक्रमांचे नियोजन

नागपूर मेट्रो स्थानकावर १५ ऑगस्ट रोजी मेंहदी उत्सव रंगला होता. याला महिलांचा चांगला प्रतिसाद मिळाला. त्यामुळे मेट्रो स्थानकावर विविध कार्यक्रमांचे आयोजन करण्याचा विचार महामेट्रोचा आहे. त्यामुळे असे विविध उपक्रम पुणे मेट्रोच्या तीस स्थानकांत राबविण्याचे नियोजन असल्याचे अधिकाऱ्यांनी सांगितले.