माळेगाव : महाराष्ट्रात विधान सभा निवडणूक ही आमच्या दृष्टीने महत्वाची आहे. या निवडणुकीसाठी आता महाविकास आघाडी पुर्णपणे तयारीला लागली आहे. एकाबाजूला रणनीती ठरवण्यासाठी नेत्यांच्या बैठका सुरु असल्या तरी महाविकास आघाडीत जागा वाटपात चांगला समन्वय आहे, अशी माहिती ज्येष्ठ नेते शरद पवार यांनी बारामतीत पत्रकारांशी बोलताना स्पष्ट केली.

विधान सभा निवडणूकीत्या निमित्ताने महायुती अथवा महाविकास आघाडीसह विविध घटक पक्षांची जोरदार तयारी सुरू आहे. इच्छुक उमेदरावांनी पक्षपातळीवर श्रेष्टींना भेटण्याचा सपाटा सावला आहे. अनेकजण दावे प्रतिदावे करीत आहेत. त्या पार्श्वभूमिवर बारामतीत राष्ट्रवादी शरदचंद्र पवार पक्षाचे सर्वेसर्वा शरद पवार यांनी जागा वाटपा बाबत आपली भूमिका मांडली.

`येत्या १० दिवसात महाविकास आघाडीचे जागा वाटप पूर्ण करण्याचा प्रयत्न करु. लोक परिवर्तनासाठी उत्सुक आहेत. सध्या कुठंही गेलं तरी निवडणूक लढवणारे इच्छुक येऊन भेटत आहेत. एकाने निर्णय घेण्याऐवजी सगळ्यांनी मिळून निर्णय घेण्याची आवश्यक आहे. सगळ्यांचा विचार करण्याची गरज आहे जे इच्छुक आहेत त्यांचा अभ्यास सुरू आहे. जयंत पाटील आणि सिनियर लोकांची टीम आहे ते मुलाखती घेतील,` असे शरद पवारांनी सांगितलं.

ते म्हणाले, `आमची आघाडी आहे आम्ही एकत्र निवडणूक लढणार आहोत. कुणी जागा लढवावी यांच्यात एकवाक्यता असणे गरजेचे आहे. जागांचे वाटप करण्याची प्रक्रिया सुरू आहे. पुढच्या १० दिवसात हे सगळं संपेल. त्यानंतर लोकांच्यात जावं लागेल आणि भूमिका मांडणे सुरू होईल. पाच वर्षांपूर्वी निवडणुका झाल्या तेव्हा काँग्रेसचा १ तर राष्ट्रवादीचे चार खासदार निवडून आले होते. आता ३० लोक निवडून आले. त्यामुळे वातावरण चांगल आहे. महाराष्ट्रात आम्हाला आशादायक चित्र आहे. सत्ताधारी भाजप आणि सहकारी पक्षांना बाजूला करण्यासाठी लोक उत्सुक आहेत. लोक परिवर्तनासाठी इच्छुक आहेत.

केजरीवाल यांना शुभेच्छा...

शरद पवारांनी अरविंद केजरीवाल आणि दिल्लीच्या नव्या मुख्यमंत्री आतिशी यांच्यावरही प्रतिक्रिया दिली आहे. केजरीवाल चांगले काम करीत होते. त्यांना तुरुंगात टाकले गेलं. आतिशी या अभ्यासू आहेत. त्या मुख्यमंत्री होत आहे त्याचा आनंद आहे. अनेकांनी चांगले नेतृत्व केलं यादेखील करतील, असा विश्वास शरद पवार यांनी व्यक्त केला.

कल्याण पाचांगणे, माळेगाव