पुणे - वाढते रस्ते अपघात रोखण्यासाठी राज्याचा परिवहन विभाग आता खासगी संस्थेची मदत घेत आहे. पुणे आरटीओ कार्यालयात ‘कृझींग सेफ’ या संस्थेने प्रायोगिक स्तरावर ‘रस्ता सुरक्षा व अनुभव प्रयोगशाळा’ सुरू केली आहे. यात वाहन परवान्यासाठी ‘आरटीओ’ची चाचणी देण्याआधी उमेदवारांना तीन स्तरांवर चाचणी द्यावी लागत आहे. राज्यातील तीन आरटीओ कार्यालयांत अशी ‘अनुभव प्रयोगशाळा’ सुरू झाली असून, यात पुणे आरटीओचादेखील समावेश आहे.

गेल्या काही दिवसांत पुणे शहर व जिल्हात रस्ते अपघातांची संख्या वाढली आहे. अपघात रोखण्यासाठी वाहनचालकांचे केवळ समुपदेशन करून चालणार नाही, तर त्यांना प्रशिक्षण देण्याचीदेखील गरज निर्माण झाली आहे. पुणे आरटीओ कार्यालयात सुरू झालेल्या ‘अनुभव प्रयोगशाळे’च्या माध्यमातून शिकाऊ वाहन परवाना काढण्यासाठी येणाऱ्या उमेदवारांना तीन स्तरांवर चाचणी द्यावी लागत आहे.

पहिल्या स्तरात रस्ते वाहतुकीचे नियम मोडल्यास किती दंड होतो, याविषयी प्रश्‍न विचारले गेले आहेत, दुसऱ्यात वाहतुकीचे नियम सांगून त्यावर आधारित प्रश्‍न विचारले गेले आहेत आणि तिसऱ्या स्तरात व्हिडिओ दाखविण्यात आला आहे. उमेदवारांना चाचणी देण्यासाठी येथेच संस्थेच्या वतीने मोबाइल उपलब्ध केला असून, मोबाइलवर ऑनलाइन चाचणी द्यायची आहे.

एका वेळी सुमारे १० ते १२ उमेदवार चाचणी देऊ शकतात. तत्पूर्वी आरटीओचे मोटार वाहन निरीक्षक उपस्थित उमेदवारांना मार्गदर्शन करतात. त्यांनतर प्रत्यक्षात चाचणीला सुरुवात केली जाते. यात २० प्रश्‍न व व्हिडिओ दाखवून मार्गदर्शन केले जात आहे. दिवसातून किमान ५० उमेदवारांना विशेष प्रशिक्षण दिले जात आहे.

पुणे आरटीओ कार्यालयात सुरू करण्यात आलेल्या या लॅबद्वारे घेण्यात येणारी चाचणी ही उमेदवारांना अनिवार्य नाही. मात्र या चाचणीमुळे वाहनधारकांना रस्तेविषयक नियमांची चांगली माहिती मिळते. यामुळे अपघात कमी होण्याची शक्यता असल्याचे संबंधित संस्थेला वाटते. उमेदवारांचादेखील याला चांगला प्रतिसाद लाभत आहे. या चाचणीसाठी सुमारे १० ते १५ मिनिटांचा वेळ लागतो. तत्पूर्वी आरटीओच्या निरीक्षकांचेदेखील मार्गदर्शन सुरू असते. यासाठी कोणतेही शुल्क द्यावे लागत नाही.

रस्ते अपघात कमी करण्यासाठी राज्यातील तीन आरटीओ कार्यालयांत केंद्र स्थापन केले आहे. यात पुण्याचादेखील समावेश आहे. नागरिकांनी सुरक्षित रस्ते वाहतूक करावी, यासाठी आम्ही प्रयत्नशील आहोत.

- गणेश ओकरे, केंद्र व्यवस्थापक, कृझींग सेफ.