पुणे : विद्यार्थ्याने इनशर्ट केली नाही म्हणून त्याला बेदम मारहाण करण्यात आल्याचा प्रकार उघडकीस आला आहे. शिक्षकाने केलेल्या मारहाणीत विद्यार्थ्याच्या नाकातून व कानातून रक्त आले होते. मारहाण झालेला मुलगा स्वारगेट परिसरातील एका शाळेत शिकतो. २७ सप्टेंबरला हा प्रकार घडला होता. याबाबत शिक्षकावर गुन्हा दाखल करण्यात आला आहे.

संदेश भोसले (वय २६) असे गुन्हा दाखल करण्यात आलेल्या शिक्षकाचे नाव आहे. मुलाच्या वडिलांनी याबाबत फिर्याद दिली आहे. त्यानुसार शिक्षकावर स्वारगेट पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी यांचा ११ वर्षीय मुलगा स्वारगेट परिसरातील एका शाळेत सहावीच्या वर्गात शिकत आहे.

मुलाचा कॉम्पुटर क्लास सुरू असता त्याचे शिक्षक भोसले यांनी मुलाला इनशर्ट का केले नाही, असे विचारत हाताने बेदम मारहाण केली. या मारहाणीत मुलाच्या नाकातून व कानातून रक्त आले. या घटनेची माहिती मुलाने शाळेतून घरी आले आल्यानंतर फिर्यादी आणि आर्इला दिली. त्यानंतर मुलाच्या वडिलांनी याबाबत तक्रार दिली आहे. स्वारगेट पोलिस ठाण्याचे सहायक पोलिस उपनिरीक्षक संतोष तानवडे या गुन्ह्याचा तपास करत आहेत.