पुणे : पुणे जिल्हा परिषदेवर प्रशासकराज आल्यापासून म्हणजेच मागील दोन वर्षांपासून सातत्याने जिल्हा परिषदेचे जिल्हा शिक्षक पुरस्कार जाहीर होण्यास मोठा विलंब होऊ लागला आहे. यामुळे दरवर्षी शिक्षकदिनी प्रदान केले जाणारे हे पुरस्कार मागील वर्षापासून शिक्षकदिन उलटून गेल्यानंतर जाहीर केले जाऊ लागले आहेत.

यंदाही याची पुनरावृत्ती झाली असून, अद्याप जिल्हा शिक्षक पुरस्कारांची यादी जाहीर झालेली नाही. यामुळे यंदाही येत्या शिक्षकदिनी (ता.५) हे पुरस्कार प्रदान करण्याचा मुहूर्त टळणार असल्याचे स्पष्ट झाले आहे.

जिल्हा शिक्षक पुरस्कार हे दरवर्षी शिक्षकदिनापुर्वी किमान दोन दिवस आधी जाहीर करण्याची आणि शिक्षकदिनी म्हणजेच ५ सप्टेंबर रोजी हे पुरस्कार खास समारंभात प्रदान करण्याची प्रथा चालू आहे. मात्र प्रशासकराज आल्यापासून ही प्रथा खंडित झाली आहे. प्रथा खंडित होण्याचे यंदाचे हे सलग दुसरे वर्ष आहे.

जिल्हा परिषदेच्या वतीने दरवर्षी प्रत्येक तालुक्यातील प्रत्येकी एक, याप्रमाणे तेरा तालुक्यांमधील मिळून तेरा शिक्षकांना जिल्हा शिक्षक तर, अन्य तेरा शिक्षकांना प्रोत्साहनपर शिक्षक पुरस्काराने गौरविण्यात येते. याशिवाय याच कार्यक्रमात इयत्ता पाचवी आणि आठवीच्या शिष्यवृत्ती परीक्षेत किमान पाच किंवा त्यापेक्षा अधिक विद्यार्थ्यांना शिष्यवृत्ती मिळालेल्या शाळेतील शिक्षकांचा खास गौरव केला जातो.

पुणे जिल्हा परिषदेच्या पदाधिकाऱ्यांचा कार्यकाळ २० मार्च २०२२ रोजी संपुष्टात आलेला आहे. तेव्हापासून आजतागायत जिल्हा परिषदेवर प्रशासकराज आहे. यानुसार गेल्या वर्षी शिक्षकदिनीही प्रशासकराज होते. त्यामुळे गेल्या वर्षीचा जिल्हा शिक्षक पुरस्कार वितरण समारंभही शिक्षकदिनी झाला नव्हता. यंदा त्याचीच पुनरावृत्ती होत असल्याचे दिसून आले आहे.