पुणे : शहरात यंदाच्या उन्हाळ्यात पावसाने शतक ठोकले. मार्च ते मे मध्ये शहरात १२२ मिलिमीटर पावसाची नोंद झाली. त्यापैकी २५.३ मिमी पाऊस रविवारी सकाळी साडेआठ वाजेपर्यंतच्या २४ तासांमध्ये पडला. पुढील आठवड्यातही पूर्वमोसमी पावसाच्या सरी पडणार असल्याचे हवामान खात्यातर्फे सांगण्यात आले.

शहरात मार्चपासून उन्हाचा चटका जाणवू लागला होता. पण, २१ मार्चला विजांच्या कडकडाटासह पावसाच्या सरी कोसळल्या. विदर्भामध्ये निर्माण झालेल्या कमी दाबाच्या पट्ट्याचा थेट परिणाम पुण्यावर झाला होता. होळीनंतर उन्हाचा चटका पुन्हा वाढू लागला. पण, उत्तरेतून येणारे कोरडे वारे आणि अरबी समुद्रावरून येणाऱ्या बाष्पयुक्त वारे महाराष्ट्रावर एकत्र येत होते. त्यामुळे पुण्यासह मध्य महाराष्ट्रातील बहुतांश भागात एप्रिलच्या अखेरीस गारांचा पाऊस पडला. त्यानंतर मे मध्ये वेळोवेळी पूर्वमोसमी पावसाने लावलेली हजेरी आणि तौक्ते चक्रीवादळाच्या प्रभावामुळे पुण्यात झालेला जोरदार पाऊस या सर्वांचा परिणाम म्हणून यंदाच्या उन्हाळ्यात पावसाचे शतक झाले. मे च्या शेवटीही पावसाने दमदार हजेरी लावली. शनिवारी ढगांच्या गडगडाटासह कोसळलेल्या पावसाची शिवाजीनगर येथील वेधशाळेत २५.३ मिलिमीटर नोंद झाली. तर, लोहगावमध्ये ३७.८ मिलिमीटर पडला. पाषाण येथे ३२.४ मिलिमीटर पाऊस नोंदला गेला.

पूर्वमोसमी पावसाचा आठवडा

पुण्यासह मध्य महाराष्ट्रात पुढील चार दिवस पूर्वमोसमी पाऊस कोसळेल. ढगांच्या गडगडाटासह सोसाट्याचा वारा सुटेल, अशी शक्यता हवामान खात्याने रविवारी व्यक्त केली. येत्या सोमवारी (ता. ३१) आकाश अंशतः ढगाळ राहून विजांच्या कडकडाटासह पावसाच्या हलक्या सरी पडतील, असा अंदाज आहे. येत्या मंगळवारपासून (ता. १) शनिवारपर्यंत (ता. ५) पाऊस पडेल, असे हवामान खात्याने सांगितले.

उन्हाळ्यात पडलेला पाऊस (१ मार्च ते ३० मे, सर्व आकडे मिलीमीटरमध्ये)

पुणे .......... १२१.९

लोहगाव ..... ९७

पाषाण ........ १४१