पुणे - स्वारगेट एसटी स्थानक परिसरात प्रवाशांना धमकावून लुटणाऱ्या रिक्षाचालकासह त्याच्या टोळीतील अन्य दोघांना स्वारगेट पोलिसांनी अटक केली. पोलिसांनी शंभराहून अधिक सीसीटीव्ही चित्रीकरण तपासून तांत्रिक विश्लेषणाच्या आधारे आरोपींचा शोध घेतला.

रिक्षाचालक रोहित सुभाष चव्हाण (वय २३, रा. भेकराईनगर, फुरसुंगी, हडपसर), त्याचे साथीदार मयूर ऊर्फ संकेत प्रकाश चव्हाण (वय १९, रा. मंतरवाडी, उरुळी देवाची) आणि सुदर्शन शिवाजी कांबळे (वय २२, रा. म्हाडा कॉलनी, वारजे माळवाडी) अशी अटक केलेल्या आरोपींची नावे आहेत.

त्यांच्या ताब्यातून रिक्षासह ८० हजार रुपयांचा मुद्देमाल जप्त करण्यात आला आहे. आरोपी सराईत गुन्हेगार असून, त्यांच्याविरुद्ध सिंहगड रस्ता, बंडगार्डन, बिबवेवाडी, भारती विद्यापीठ आणि स्वारगेट पोलिस ठाण्यात गंभीर गुन्हे दाखल आहेत.

फिर्यादी तरुण स्वारगेट येथील पीएमपी बस स्थानकापासून २७ ऑगस्ट रोजी रात्री साडेनऊ वाजण्याच्या सुमारास रिक्षातून घरी निघाला होता. काही अंतरावर गेल्यावर रिक्षाचालकाने फोन करण्याच्या बहाण्याने त्याच्याकडून मोबाईल घेतला. त्याला पर्वती इंडस्ट्रीज, गंगाधाम चौक, लुल्लानगर परिसरात रिक्षा फिरवून पाचशे रुपये आणि त्याच्या नातेवाइकांकडून चार हजार रुपये ऑनलाइन घेतले.

त्यानंतर चांदीची साखळी आणि मोबाईल हिसकावून चोरटे पसार झाले होते. या गुन्ह्याचा तपास करताना पोलिसांनी शंभराहून अधिक सीसीटीव्ही चित्रीकरण तपासून आरोपींचा शोध घेतला. अतिरिक्त पोलिस आयुक्त प्रवीणकुमार पाटील, पोलिस उपायुक्त स्मार्तना पाटील आणि सहाय्यक आयुक्त नंदिनी वग्यानी यांच्या सूचनेनुसार वरिष्ठ निरीक्षक युवराज नांद्रे, पोलिस निरीक्षक (गुन्हे) चांगदेव सजगणे, पोलिस उपनिरीक्षक रवींद्र कस्पटे यांच्या पथकाने ही कारवाई केली.