शिरूर, ता. १९ ः बेकायदा जमाव जमवून, रांजणगाव एमआयडीसी व परिसरात मारामाऱ्या, दहशत निर्माण करणाऱ्या सहा जणांच्या टोळीला तडीपार करण्याचे आदेश जिल्हा पोलिस अधिक्षक डॉ. अभिनव देशमुख यांनी दिले. या टोळीने सामान्य नागरीकांना त्रास देण्याचे गंभीर गुन्हे केल्याने ही तडीपारीची कारवाई केल्याचे देशमुख यांनी स्पष्ट केले.
अक्षय अंबर पवार (रा. टाकळी हाजी, ता. शिरूर, जि. पुणे), नीलेश ऊर्फ सोन्या पोपट डांगे, प्रमोद ऊर्फ सोनू शांताराम डांगे, राहुल बाबाजी कदम, अक्षय ज्ञानेश्वर
कदम व वैभव नारायण खिलारे (सर्व रा. सोनेसांगवी, ता. शिरूर, जि. पुणे) अशी तडीपार केलेल्या टोळीतील तरुणांची नावे आहे. त्यांना पुणे जिल्ह्यातील शिरूरसह़ खेड, हवेली, दौंड, आंबेगाव व नगर जिल्ह्यातील पारनेर अशा सहा तालुक्यांतून सहा महिन्यांसाठी तडीपार केले असल्याचे जिल्हा पोलिस अधिक्षक डॉ. देशमुख यांनी सांगितले.
टाकळी व सोनेसांगवी या गावांतील हे तरुण स्थानिक असल्याच्या नावाखाली परिसरात व विशेषतः रांजणगाव एमआयडीसी क्षेत्रात दहशत माजवत होते. बेकायदा टोळी तयार करून मारामाऱ्या करणे, सामान्य नागरीकांना विनाकारण त्रास देणे असे गुन्हे वारंवार करीत होते. दहशतीचे अनेक गंभीर गुन्हे दाखल होऊनही व त्याबाबत वारंवार समज देऊनही त्यांच्या वर्तनात सुधारणा न झाल्याने त्यांच्याविरुद्ध तडीपारीचा अहवाल पोलिस उपनिरीक्षक विनोद शिंदे यांच्यामार्फत उपविभागीय पोलिस अधिकारी राहुल धस यांना सादर केला होता. त्यांनी शहानिशा करून अंतिम अहवाल जिल्हा पोलिस अधिक्षकांना सादर केला. या अहवालाची दखल त्यांनी घेतली व तरूणांच्या गंभीर गुन्ह्यांना चाप बसविण्यासाठी तडीपारीचे आदेश बजावले असल्याची माहिती रांजणगाव एमआयडीसी पोलिस ठाण्याचे पोलिस निरीक्षक
बलवंत मांडगे यांनी दिली. तडीपारीच्या कालावधीत हे तरुण हद्दपार केलेल्या तालुक्यांत दिसून आल्यास पोलिसांना माहिती द्यावी, असे आवाहनही त्यांनी केले.