आळेफाटा, ता. ८ : आळेफाटा (ता. जुन्नर) येथील बसस्थानकात मोठमोठे खड्डे पडले असून यात पावसाचे पाणी साचले आहे. आळेफाटा बसस्थानक पुणे-नाशिक व नगर-कल्याण या दोन राष्ट्रीय महामार्गावरील मध्यवर्ती ठिकाण असून येथील बसस्थानकावर दररोज तीनशे ते साडेतीनशे एसटी बस ये-जा करत असतात. त्यामुळे याठिकाणी नेहमीच गर्दी असते. परंतु या ठिकाणी आल्यानंतर प्रवाशांना बसमध्ये चढताना व उतरताना पाण्यातूनच जावे लागते. तसेच बस स्थानकात आल्यानंतर उभी राहत असताना खड्ड्यांतील पाणी प्रवाशांच्या अंगावर उडत असल्याने प्रवासी व बसचालक यांच्यात नेहमी वाद होताना दिसून येत आहे. त्यामुळे येथील खड्डे लवकरात लवकर बुजवावेत, अशी मागणी प्रवाशांकडून होत आहे.